ఈనాడు కథనం ప్రకారం, ఈ ముఠాకు ప్రధాన సూత్రధారి హైదరాబాద్‌లోని అలీజాకోట్లకు చెందిన మహమ్మద్ ముజఫర్ హుస్సేన్ అలియాస్ గుడ్డు. వారసత్వంగా వచ్చిన భారీ ఆస్తితో విలాసవంతమైన జీవితానికి అలవాటు పడిన గుడ్డు, తన సరదా కోసం వన్యప్రాణులను వేటాడటం ప్రారంభించాడు. ఇందుకోసం అతడు అత్యాధునిక ఎయిర్ గన్స్‌ను కూడా కొనుగోలు చేశాడు. ఈ క్రమంలోనే జడ్చర్లకు చెందిన ఎంబీఏ విద్యార్థి మీర్ అహ్మద్ అమీర్‌తో పరిచయం ఏర్పడింది. అమీర్ తనకు తెలంగాణ రైఫిల్ అసోసియేషన్‌లో సభ్యత్వం ఉందని, లైసెన్స్‌డ్ తుపాకీ ఉందని చెప్పి ఈ ముఠాలో చేరాడు.

వీరికి మక్తల్‌కు చెందిన కె.శేఖర్ అనే వ్యక్తి అటవీ ప్రాంతంలో వన్యప్రాణులు ఎక్కడ ఎక్కువగా తిరుగుతాయో సమాచారం ఇచ్చేవాడు. ముఠా సభ్యులంతా కలిసి అర్థరాత్రి దాటిన తర్వాత ఖరీదైన కార్లలో అటవీ ప్రాంతాలకు బయలుదేరేవారు. జింకలు లేదా కుందేళ్లు కనిపించగానే, శక్తివంతమైన టార్చ్ లైట్లను వాటి కళ్లపై వేసి అవి కదలకుండా చేసేవారు. ఆ సమయంలో గురి చూసి తుపాకులతో కాల్చి చంపేవారు. కేవలం ఫిబ్రవరి నెల వరకు వీరు పదుల సంఖ్యలో జింకలను, సుమారు 2 వేలకు పైగా కుందేళ్లను వేటాడినట్లు దర్యాప్తులో తేలింది.

నిందితులు తాము వేటాడిన దృశ్యాలను, చంపిన జంతువుల ఫోటోలను తమ సెల్‌ఫోన్లలో గర్వంగా చిత్రీకరించుకునేవారు. అయితే, ముజఫర్ హుస్సేన్‌కు తన సోదరుడితో ఆస్తి తగాదాలు ఉన్నాయి. హుస్సేన్ తుపాకులు కొనుగోలు చేయడం గమనించిన అతని సోదరుడు, ఎక్కడ తనపై దాడి చేస్తాడో అన్న భయంతో పోలీసులకు ఫిర్యాదు చేశాడు. పోలీసులు హుస్సేన్‌ను అదుపులోకి తీసుకుని అతని ఫోన్ పరిశీలించగా, అందులో ఉన్న వేట వీడియోలు, ఫోటోలు చూసి విస్తుపోయారు.

ఈ ఆపరేషన్‌లో పోలీసులు నిందితుల నుంచి 4 ఎయిర్ గన్స్, 1 లైసెన్స్‌డ్ స్పోర్టింగ్ రైఫిల్, 20 తూటాలు, పెల్లెట్స్. వేట కోసం వాడే ఒక కారు, 8 మొబైల్ ఫోన్లు, ఒక బటన్ నైఫ్ స్వాధీనం చేసుకున్నారు. వేటాడిన జంతువుల మాంసాన్ని వీరు వండుకుని తినగా, చర్మం, తల వంటి అవశేషాలను జూరాల బ్యాక్‌వాటర్స్ కాలువలో పడేసేవారని పోలీసులు వెల్లడించారు. ప్రస్తుతం అరెస్టయిన ఆరుగురిని అటవీ శాఖ అధికారులకు అప్పగించి, వన్యప్రాణుల సంరక్షణ చట్టం కింద కఠిన చర్యలు తీసుకుంటున్నారు.