ఆదివారం వేకువజామున సుమారు 2:15 గంటల సమయంలో వారు ట్యాంక్‌బండ్ వద్ద గల అంబేడ్కర్ విగ్రహం సమీపానికి చేరుకున్నారు. రోడ్డు పక్కన కారును నిలిపిన సాయినాథ్, డిక్కీలో ఉన్న బర్త్‌డే కేక్‌ను బయటకు తీసేందుకు వెళ్లారు. అదే సమయంలో విశ్వంత్ చిన్నారి సరాక్షిని ఎత్తుకుని రోడ్డు దాటుతున్నారు. సరిగ్గా ఆ క్షణంలో సికింద్రాబాద్ వైపు నుంచి విపరీతమైన వేగంతో దూసుకొచ్చిన లారీ వీరిని బలంగా ఢీకొట్టింది. లారీ ఢీకొట్టిన తీవ్రతకు చిన్నారి, విశ్వంత్ ఇద్దరూ గాల్లోకి ఎగిరి తీవ్ర గాయాలతో రోడ్డుపై పడిపోయారు. కళ్లముందే జరిగిన ఈ ఘోరాన్ని చూసి కుటుంబసభ్యులు హాహాకారాలు చేశారు.

రక్తపు మడుగులో కొట్టుమిట్టాడుతున్న చిన్నారి సరాక్షిని తండ్రి సాయినాథ్ వెంటనే తన కారులోనే సమీపంలోని ప్రైవేటు ఆసుపత్రికి తరలించారు. అయితే అప్పటికే చిన్నారి ప్రాణాలు కోల్పోయినట్లు వైద్యులు ధ్రువీకరించారు. తీవ్రంగా గాయపడిన విశ్వంత్‌ను స్థానికుల సాయంతో ‘108’ అంబులెన్స్‌లో సికింద్రాబాద్ గాంధీ ఆసుపత్రికి తరలించారు. అక్కడ అత్యవసర విభాగంలో చికిత్స పొందుతూ ఆయన కూడా ఆదివారం ఉదయం తుదిశ్వాస విడిచారు. పుట్టినరోజు పూట ముద్దులొలికే బిడ్డ, చేదోడువాదోడుగా ఉండే బంధువు ఒకేసారి మృత్యువాత పడటంతో ఆ కుటుంబంలో తీరని శోకం అలుముకుంది. ప్రమాదానికి కారణమైన లారీ డ్రైవర్‌పై దోమలగూడ పోలీసులు కేసు నమోదు చేసి దర్యాప్తు చేస్తున్నారు.