భారీ లక్ష్య ఛేదనలో భారత జట్టుకు శుభారంభం లభించలేదు. అభిషేక్ శర్మ (3) త్వరగా అవుటయ్యాడు. అయితే మరో ఎండ్‌లో సంజూ సామ్సన్ ఉన్నంత సేపు ధాటిగా ఆడాడు. అయితే స్యామ్ కరణ్ బౌలింగ్‌లో అవుటయ్యాడు. అనంతరం ఇషాన్ కిషన్, శ్రేయస్ అయ్యర్‌లు కాసేపు నిలబడే ప్రయత్నం చేశారు. అయితే డ్రింక్స్ బ్రేక్ అనంతరం అయ్యర్ అవుటయ్యాడు. క్రీజులోకి వచ్చిన తిలక్ వర్మ వేగంగా ఆడాడు. అయితే అర్ధ సెంచరీల తర్వాత అటు ఇషాన్ కిషన్, ఇటు తిలక్ వర్మ అవుటయ్యారు. శివమ్ దూబే (14) నిరాశ పరిచారు. చేయాల్సిన పరుగులు ఎక్కువగా ఉండటంతో భారత జట్టు ఓటమి ఖాయమైంది.

అంతకుముందు తొలుత బ్యాటింగ్ చేసిన ఇంగ్లండ్ 20 ఓవర్లలో 3 వికెట్లకు 257 పరుగులు చేసింది. జాస్ బట్లర్ (64 బంతుల్లో 131; 12 ఫోర్లు, 8 సిక్సర్లు) విశ్వరూపం ప్రదర్శించాడు. కెప్టెన్ బ్రూక్ (45 బంతుల్లో 95 నాటౌట్; 4 ఫోర్లు, 8 సిక్సర్లు) కూడా చెలరేగాడు. ఫలితంగా ఇంగ్లండ్ భారీ స్కోరు సాధించింది. రెండో వికెట్‌కు బట్లర్, బ్రూక్ 233 పరుగుల భారీ భాగస్వామ్యాన్ని నెలకొల్పారు.