రుతురాజ్ గైక్వాడ్ తన సొంత శైలిలో జట్టును నడిపించాలే తప్ప, ఎవరినో అనుకరించడానికి ప్రయత్నించవద్దని తను గట్టిగా చెప్పినట్లు ధోని వెల్లడించాడు. “నేను రుతురాజ్‌తో ఒకటే చెప్పాను.. నీకు ఎలా నచ్చితే అలా, నీ సొంత పద్ధతిలోనే సీఎస్‌కేను నడిపించు అని. నేను కూడా చాలా సుదీర్ఘ కాలం పాటు ఈ జట్టును నా పద్ధతిలోనే నడిపించాను. క్రికెట్ అనేది మైదానంలో కెప్టెన్ మాత్రమే నిర్ణయాలు తీసుకోవాల్సిన ఆట అని నేను ఎప్పుడూ నమ్ముతాను. అవును, జట్టుకు కోచ్‌లు, సపోర్ట్ స్టాఫ్ ఉంటారు.. కానీ ఇది ఫుట్‌బాల్ గేమ్ కాదు. ఫుట్‌బాల్‌లో మేనేజర్ లేదా కోచ్ ప్రతిదీ నిర్ణయిస్తారు. కానీ క్రికెట్‌లో మాత్రం అంతా కెప్టెన్ చేతుల్లోనే ఉంటుంది, అతడే తుది నిర్ణయం తీసుకోవాలి” అని ధోని స్పష్టం చేశాడు.

సీనియర్‌గా తాను ఇచ్చే సలహాలు ఎప్పుడూ రుతురాజ్‌కు ఒక శాసనంగా మారకూడదని ధోని స్పష్టం చేశాడు. “నేను చాలా ఓపెన్‌గా ఉంటాను. నీ దగ్గరకు వచ్చి మాట్లాడతాను. కానీ నేను చెప్పిన విషయాల్లో ఒక్కటి కూడా నువ్వు ఖచ్చితంగా చేయాలనే నియమం లేదు. ఉదాహరణకు నేను నీకు ఒక 10 సలహాలు ఇస్తే, అందులో నువ్వు ఒక్కటి కూడా పాటించకపోయినా పర్వాలేదు, అది పూర్తిగా న్యాయమే. ఎందుకంటే నువ్వు లీడర్‌గా ఉన్నప్పుడు ఆ బాధ్యతను నువ్వే మోయాలి. ఒక నాయకుడిగా నీ దగ్గర ఉన్న వనరులు ఏంటి? వాటిని నువ్వు ఎలా ఉపయోగించుకోవాలి? అనేది నీ ఇష్టానికే వదిలేయాలి” అని ధోని పేర్కొన్నాడు.

చెన్నై సూపర్ కింగ్స్ ఫ్రాంచైజీ విజయాల వెనుక ఉన్న రహస్యాన్ని వివరిస్తూ.. “మేము ఎప్పుడూ క్రికెట్‌కు సంబంధించిన ప్రాధాన్యతలపై మాత్రమే దృష్టి కేంద్రీకరిస్తాము. అవును, ఒక ఫ్రాంచైజీగా కమర్షియల్ ఈవెంట్లు, క్రికెట్ చుట్టూ ఉండే ఇతర వ్యాపార కార్యకలాపాలు చాలా చేయాల్సి వస్తుంది. కానీ మా మూలస్తంభం (Essence) కేవలం క్రికెట్ మాత్రమేనని మాకు తెలుసు. మేము ఎప్పుడూ దానికి కట్టుబడే ఉంటాము” అని ధోని తెలిపాడు.

కోట్లాది మంది అభిమానులు తనను ప్రాణంగా ప్రేమించడంపై ధోని స్పందిస్తూ.. ఇందులో ఎలాంటి కృత్రిమత్వం లేదన్నాడు. “నా విషయానికి వస్తే, నేను ఎప్పుడూ అభిమానులను ప్రత్యేకంగా ఆకట్టుకోవాలని (Woo fans) లేదా సోషల్ మీడియాలో ఎక్కువ మంది ఫాలోవర్లను సంపాదించుకోవాలని అనుకోలేదు. నేను ఎప్పుడూ సహజంగా, నా నిజాయితీతో (Authentic) మాత్రమే ఉండాలని అనుకున్నాను. ఎప్పుడైతే మీరు సహజత్వంతో ఉంటారో, ప్రజలు మిమ్మల్ని ప్రేమించడం మొదలుపెడతారు. మీలో వారికి నచ్చిన విషయాలను వారు స్వీకరిస్తారు” అని నేటి తరం యువ క్రికెటర్లకు ధోని ఒక చక్కని సందేశాన్ని ఇచ్చాడు.