ఈ ఒప్పందంలో భాగంగా 60 రోజుల పాటు కాల్పుల విరమణ పొడిగిస్తారు. ఈ సమయంలో ఇరాన్ స్వేచ్ఛగా చమురు అమ్ముకోవచ్చు. బదులుగా 30 రోజుల్లోగా అమెరికా తన నౌకాదళ దిగ్బంధనాన్ని పూర్తిగా ఎత్తివేయాలని, నిలిపివేసిన ఇరాన్ నిధులను విడుదల చేయాలని టెహ్రాన్ డిమాండ్ చేస్తోంది. అయితే అణు కార్యక్రమ నియంత్రణకు సంబంధించిన ఒకటి రెండు క్లాజులపై ఇంకా చిన్నపాటి భేదాభిప్రాయాలు కొనసాగుతున్నాయి.

భారత పర్యటనలో ఉన్న అమెరికా విదేశాంగ మంత్రి మార్కో రూబియో దిల్లీలో మాట్లాడుతూ, ఇరాన్‌తో చర్చల్లో పురోగతి లభించిందని, కొన్ని గంటల్లోనే ప్రపంచానికి శుభవార్త వస్తుందని చెప్పారు. ఇరాన్ జాతీయ భద్రతా మండలి దీనిని ఆమోదిస్తే, తుది సంతకం కోసం సుప్రీం లీడర్ అయతొల్లా మొజ్తబా ఖమేనీకి పంపుతారు. ఇరాన్ ఎప్పటికీ అణు ఆయుధాలను తయారు చేయబోదని ఈ ఒప్పందంలో స్పష్టం చేశారు.

ఈ ఒప్పందం ప్రకారం అమెరికా కూటమి ఇరాన్‌పై దాడులు చేయదు. ఇరాన్ కూడా అమెరికాపై ముందస్తు సైనిక దాడులు చేయబోమని హామీ ఇచ్చింది. హార్ముజ్ జలమార్గంలో ఇరాన్ అమర్చిన మైన్లను తొలగించి, ఎలాంటి పన్నులు లేకుండా నౌకలను అనుమతిస్తారు. ఇరాన్ తన వద్ద ఉన్న సుసంపన్నమైన యురేనియం నిల్వలను వదులుకోవడానికి అంగీకరించింది. ఈ ఒప్పందంతో లెబనాన్‌లో ఇజ్రాయెల్, హిజ్బుల్లా మధ్య జరుగుతున్న యుద్ధం కూడా ముగిసిపోతుందని అమెరికా అధికారులు ధృవీకరించారు.