JanaSena Party Controversy: ఆంధ్రప్రదేశ్‌లో గత అసెంబ్లీ ఎన్నికల తర్వాత బలమైన స్థానిక పార్టీగా జనసేన ఆవిర్భవించింది. కూటమి ప్రభుత్వంలో కీలక భూమిక పోషిస్తున్న ఏపీ డిప్యూటీ సీఎం, పార్టీ అధ్యక్షుడు పవన్ కల్యాణ్ చరిష్మా ప్రజల్లో పెరుగుతుంటే.. ఆపార్టీ నుంచి గెలిచిన నేతలు, నాయకులపై మాత్రం లైంగిక వేధింపుల ఆరోపణలు, విమర్శలు రోజు రోజుకు పెరుగుతున్నాయి. అయితే ఇందులో వాస్తవం ఎంతుంది..? పార్టీ చీఫ్ వీటీని ఖండించకపోవడం వల్లే జనసేన పార్టీ నేతలపై విమర్శలు పెరుగుతున్నాయా అనేది ఇప్పుడు రాష్ట్రంలో హాట్ టాపిక్‌గా మారింది. రైల్వేకోడూరు ఎమ్మెల్యే అరవ శ్రీధర్ హర్షవీణ అనే యువతిని ప్రేమ, పెళ్లి పేరుతో శారీరకంగా లోబర్చుకొని మోసం చేశాడని స్వయంగా బాధితురాలే మీడియా, సోషల్ మీడియాలో అందుకు సంబంధించిన ఫోటోలు, వీడియోలు పోస్ట్ చేసి జనసేన పార్టీ ప్రతిష్టను దిగజార్చింది. దీనికి తోడు కొద్ది రోజుల క్రితమే జనసేన నాయకుడు, అరవ శ్రీధర్ అనుచరులు కలిసి ఓ యువతిని ఆమె తరపు లాయర్‌ని నడిరోడ్డుపై చితకబాదారు. ఇది మర్చిపోక ముందే మరో జనసేన నేతపై లైంగిక ఆరోపణలు తెరపైకి వచ్చాయి. పశ్చిమగోదావరి జిల్లాకు చెందిన ZPTC జయప్రకాశ్ నాయుడు తనను శారీరకంగా వాడుకోవడమే కాకుండా డబ్బు, నగలు తీసుకున్నాడని ఓ మహిళ వీడియోని సోషల్ మీడియాలో విడుదల చేయడం ఇప్పుడు వైరల్‌గా మారింది. అసలు జనసేన నేతలపై వస్తున్న లైంగిక వేధింపుల ఆరోపణలు వాస్తవమా..? లేక వ్యూహంలో భాగమా..? అనే సందేహాలు అందరిలో కలుగుతున్నాయి.