హైకమాండ్ నుంచి తనకు పిలుపు వచ్చిన విషయాన్ని సీఎం సిద్ధరామయ్య స్వయంగా ధృవీకరించారు. కాంగ్రెస్ ప్రధాన కార్యదర్శి కేసీ వేణుగోపాల్ తనకు ఫోన్ చేశారని ఆయన చెప్పారు. “నన్ను ఢిల్లీకి రమ్మన్నారు.. కానీ అక్కడ చర్చించబోయే అంశం ఏంటనేది నాకు ఇంకా తెలియదు. మంగళవారం ఉదయం 11 గంటలకు సమావేశం షెడ్యూల్ అయింది. ఇలాంటి ఊహాగానాలు, పుకార్లు రాజకీయాల్లో ఎప్పుడూ ఉండేవే” అని సిద్ధరామయ్య వ్యాఖ్యానించారు.

ఈ పరిణామాలపై కర్ణాటక కాంగ్రెస్‌లో మరో బలమైన నేత, ఉపముఖ్యమంత్రి డీకే శివకుమార్ కూడా అంతే ఆచితూచి స్పందించారు. కర్ణాటక కాంగ్రెస్ ఇన్‌ఛార్జ్ రణదీప్ సింగ్ సుర్జేవాలా వ్యాఖ్యలను ప్రస్తావిస్తూ.. “సుర్జేవాలా మీకు ఏం చెప్పారో నాకు తెలియదు. అధిష్ఠానం నన్ను కూడా రమ్మంటే దిల్లీకి వెళ్తాను. పార్టీ ఎప్పుడు పిలిచినా వెళ్లడం మా బాధ్యత. అయితే, లీడర్‌షిప్ మార్పు గురించి మాట్లాడటం నా పని కాదు, దానిపై నేను ఎలాంటి వ్యాఖ్యలు చేయను” అని స్పష్టం చేశారు.

2023 కర్ణాటక అసెంబ్లీ ఎన్నికల్లో కాంగ్రెస్ భారీ మెజారిటీతో విజయం సాధించినప్పటి నుంచి.. సిద్ధరామయ్య, డీకే శివకుమార్ మధ్య “రొటేషనల్ చీఫ్ మినిస్టర్” ఒప్పందం కుదిరిందనే ప్రచారం విస్తృతంగా సాగుతోంది. పార్టీ అధిష్ఠానం ఈ ఒప్పందాన్ని అధికారికంగా ఎప్పుడూ ఒప్పుకోలేదు. కానీ, ఇద్దరు నేతలూ సీఎం పదవికి సమానమైన అర్హతలు, బలమైన అనుచరవర్గం కలిగి ఉండటంతో ఈ వివాదం సమసిపోలేదు. సిద్ధరామయ్యకు అపారమైన ప్రజాదరణ, ‘అహిందా’ (వెనుకబడిన వర్గాల) సామాజిక సమీకరణాల మద్దతు, సుదీర్ఘ పరిపాలనా అనుభవం ఉన్నాయి.