కర్ణాటకలో కాంగ్రెస్ ప్రభుత్వం ఏర్పడి మూడేళ్లు పూర్తి కావస్తున్న తరుణంలో, సీఎం పీఠాన్ని దక్కించుకోవాలని డి.కె. శివకుమార్ చాన్నాళ్లుగా ప్రయత్నాలు చేస్తున్నారు. ప్రభుత్వం ఏర్పడిన సమయంలో అధిష్టానం తనకు ఇచ్చిన రొటేషనల్ సీఎం ఫార్ములాను అమలు చేయాలని ఆయన వర్గం గట్టిగా డిమాండ్ చేస్తోంది. సిద్ధరామయ్య మాత్రం కేబినెట్ మార్పులకే మొగ్గు చూపుతుండగా డీకే శివకుమార్ మాత్రం ముందుగా సీఎం మార్పుపైనే తేల్చాలని పట్టుబడుతున్నారు.

ఢిల్లీలో ఇంతటి కీలక సమావేశం జరుగుతున్నప్పటికీ, బెంగళూరులోని డి.కె. శివకుమార్ బంధువులు, అత్యంత ఆప్తులు మరియు ఆయన సోదరుడు డి.కె. సురేష్ వర్గీయులు ప్రస్తుతానికి వ్యూహాత్మక మౌనం పాటిస్తున్నారు. అధిష్టానంతో చర్చలు జరుగుతున్న సమయంలో ఎలాంటి తొందరపాటు ప్రకటనలు చేసి వివాదాలు కొనితెచ్చుకోకూడదనే ఉద్దేశంతోనే వారు సైలెంట్‌గా ఉన్నట్లు రాజకీయ విశ్లేషకులు భావిస్తున్నారు. “సమయమే అన్నింటికీ సమాధానం చెబుతుంది” అని డీకే శివకుమార్ సైతం గతంలో వ్యాఖ్యానించడం గమనార్హం.

ఈ సమావేశంలో కేవలం ముఖ్యమంత్రి మార్పు గురించే కాకుండా, కర్ణాటక నుంచి త్వరలో జరగబోయే రాజ్యసభ ఎన్నికలు, శాసనమండలి స్థానాల అభ్యర్థుల ఎంపిక, రాబోయే స్థానిక సంస్థల ఎన్నికల వ్యూహాలపై కూడా హైకమాండ్ చర్చించనుంది.