“ఎవరైనా రాజీనామా చేస్తానంటే, నేను కేవలం నిమిషాల్లోనే దానిని ఆమోదిస్తాను” అని సీఎం డీకే శివకుమార్ మంగళవారం నాడు మీడియా సమావేశంలో గట్టిగా హెచ్చరించారు. మంత్రి పదవులు దక్కని కారణంతో యశవంతరాయగౌడ వి.పాటిల్, బేలూరు గోపాలకృష్ణ వంటి సీనియర్ ఎమ్మెల్యేలు రాజీనామాకు మొగ్గుచూపినట్లు వస్తున్న వార్తల తరుణంలో సీఎం ఈ వ్యాఖ్యలు చేయడం అత్యంత ప్రాధాన్యం సంతరించుకుందని ఇండియా టైమ్స్ రిపోర్ట్ చేసింది. పార్టీ కంటే ఎవరూ ఎక్కువ కాదనీ, రాజకీయాల్లో ఇలాంటి పరిణామాలు సర్వసాధారణమేనని ఆయన స్పష్టం చేశారు. “రాజీనామాలు చేసే వారిని ఎవరూ ఆపలేరు. కానీ వారికి ఒక పార్టీ కావాలి, ఒక రాజకీయ భవిష్యత్తు కావాలి. పార్టీ ఉంటేనే మిగతావన్నీ ఉంటాయి” అని ఆయన కుండబద్దలు కొట్టారు.

అంతేకాకుండా, పార్టీలోని సీనియర్ నేతల చరిత్రను ఆయన ప్రస్తావించారు. “వీరేంద్ర పాటిల్ సీఎంగా ఉన్న హయాంలో ఎస్. బంగారప్ప, మల్లికార్జున ఖర్గే, ధరమ్ సింగ్ వంటి ఉద్దండులకు మంత్రి పదవులు దక్కలేదు. అయినప్పటికీ వారు పార్టీని వీడలేదు, సహనంతో ఉన్నారు. ఆ తర్వాత కాలంలో బంగారప్ప, ధరమ్ సింగ్ లు ముఖ్యమంత్రులు కాలేదా? కాబట్టి, ప్రస్తుత పరిస్థితుల్లో నాయకులకు అత్యంత సహనం అవసరం” అని ఆయన హితవు పలికారు.

మంత్రి పదవులు దక్కని వారికి ఇతర అవకాశాలు కల్పిస్తామని సీఎం శివకుమార్ భరోసా ఇచ్చారు. రాష్ట్రంలోని వివిధ ప్రభుత్వ బోర్డులు, కార్పొరేషన్ల పదవులను త్వరలోనే భర్తీ చేయనున్నట్లు ఆయన ప్రకటించారు. గతంలో నియమితులైన చైర్మన్ల పదవీకాలం రెండున్నరేళ్లు.. ఇప్పటికే ముగిసిందనీ, వారి స్థానంలో కొత్తవారికి, ముఖ్యంగా అసంతృప్త ఎమ్మెల్యేలు, పార్టీ శ్రేణులకు అవకాశం కల్పిస్తామని ఆయన వెల్లడించారు. మొత్తం మీద, డీకే శివకుమార్ హెచ్చరికలు.. అసంతృప్తులను దారిలోకి తెస్తాయా లేక మరింత కలకలానికి దారి తీస్తాయా అనేది రాబోయే రోజుల్లో తెలియవచ్చు.