ఇండియన్ ప్రీమియర్ లీగ్ (IPL) ప్రారంభమైన కొత్తలో.. అంటే 2008 నుంచి 2011 మధ్య కాలంలో బ్రెట్ లీ కింగ్స్ ఎలెవ‌న్ పంజాబ్ (ప్రస్తుతం పంజాబ్ కింగ్స్) జట్టుకు ప్రాతినిధ్యం వహించిన సంగతి తెలిసిందే. ఆ జట్టుకు బాలీవుడ్ నటి ప్రీతీ జింటా సహ యజమాని. ఆ సమయంలో జట్టు విజయాలను కలిసి సెలబ్రేట్ చేసుకోవడం, మ్యాచ్‌ల తర్వాత పార్టీల్లో పాల్గొనడం సర్వసాధారణంగా జరిగేది. ఈ క్రమంలోనే ఒకసారి ముంబైలోని ఓ ప్రముఖ రెస్టారెంట్‌లో వీరిద్దరూ కలిసి డిన్నర్ చేస్తూ కెమెరాలకు చిక్కారు. దీంతో అప్పట్లో వీరిద్దరి మధ్య ప్రేమాయణం నడుస్తోందని, త్వరలో పెళ్లి కూడా చేసుకోబోతున్నారంటూ జాతీయ మీడియాలో పెద్ద ఎత్తున కథనాలు వైరల్ అయ్యాయి.

చాలా సంవత్సరాల తర్వాత ఈ వార్తలపై బ్రెట్ లీ ఓపెన్ అయ్యారు. ఇటీవ‌ల ఒక మీడియా ఇంటర్వ్యూలో ఆయన మాట్లాడుతూ.. “ప్రీతి జింటా అత్యంత తెలివైన మహిళ, అద్భుతమైన వ్యక్తిత్వం కలది. ఆమెపై నాకు ఎంతో గౌరవం ఉంది. మా మధ్య డేటింగ్ నడుస్తోందంటూ వచ్చిన నిరాధారమైన కథనాలు నన్ను ఎప్పుడూ ఇబ్బంది పెట్టలేదు. ఎందుకంటే వాస్తవం ఏమిటో నాకు స్పష్టంగా తెలుసు. ప్రజలు తమకు నచ్చింది ఊహించుకుంటారు, రకరకాలుగా రాసుకుంటారు. కానీ ఆ పుకార్లను నేను ఎప్పుడూ పట్టించుకోలేదు” అని పేర్కొన్నారు. నిజానికి 2010లోనే ప్రీతి జింటా కూడా ఈ రూమర్లపై స్పందించారు. బ్రెట్ లీతో తనను రొమాంటిక్‌గా ముడిపెట్టడం ఇక ఆపేయాలని, తామిద్దరం కేవలం స్నేహితులమేనని అప్పట్లోనే క్లారిటీ ఇచ్చారు.

ప్రస్తుతం వీరిద్దరూ తమ తమ వ్యక్తిగత జీవితాల్లో సెటిల్ అయ్యి చాలా సంతోషంగా ఉన్నారు. బ్రెట్ లీ 2014లో లానా అండర్సన్‌ను వివాహం చేసుకోగా, వారికి ఇద్దరు పిల్లలు ఉన్నారు. మరోవైపు, ప్రీతి జింటా 2016లో అమెరికన్ వ్యాపారవేత్త జీన్ గుడ్‌ఇనఫ్‌ను పెళ్లాడారు. ఇక సినిమాల విషయానికి వస్తే.. పెళ్లి తర్వాత బాలీవుడ్‌కు కాస్త దూరమైన ప్రీతీ జింటా, త్వరలో ‘బట్వారా 1947’ (Batwara 1947) చిత్రంతో సెకండ్ ఇన్నింగ్స్ ప్రారంభించనున్నారు. ఈ సినిమా ఆగస్టు 14న థియేటర్లలో భారీ స్థాయిలో విడుదల కానుంది.