నందిని రెడ్డి దర్శకత్వంలో రూపొందిన ఈ చిత్రాన్ని సమంత స్వయంగా రాజ్ నిడిమోరుతో కలిసి నిర్మించారు. జూన్ 19న విడుదలైన ఈ సినిమా మొదటి రోజునే మంచి టాక్‌ను సొంతం చేసుకుంది. మహిళా ప్రధాన కథాంశంతో వచ్చినప్పటికీ కుటుంబ ప్రేక్షకులను ఆకట్టుకోవడంతో పాటు మాస్, యూత్ నుంచి కూడా విశేష ఆదరణ పొందింది. బలమైన కథ, ఎమోషన్స్, యాక్షన్ ఎపిసోడ్లు, సమంత నటన సినిమాకు ప్రధాన బలాలుగా నిలిచాయి.

ఈ సినిమా విడుదలైన కొద్ది రోజుల్లోనే మహిళా ప్రధాన చిత్రాల కలెక్షన్ల రికార్డులను అధిగమించింది. అనుష్క శెట్టి నటించిన ‘అరుంధతి’, కీర్తి సురేష్ నటించిన ‘మహానటి’ వంటి చిత్రాల రికార్డులను అధిగమించిన ‘మా ఇంటి బంగారం’ ఇప్పుడు రూ.100 కోట్ల క్లబ్‌లోకి అడుగుపెట్టి మరో అరుదైన మైలురాయిని అందుకుంది. తెలుగు సినీ చరిత్రలో ఇంత భారీ వసూళ్లు సాధించిన తొలి సోలో హీరోయిన్ చిత్రం ఇదే కావడం విశేషం.

సినిమా రూ.100 కోట్ల మార్క్ దాటిన సందర్భంగా చిత్రబృందం ప్రత్యేక పోస్టర్‌ను విడుదల చేసింది. ఈ సందర్భంగా సమంత భావోద్వేగానికి గురైన వీడియో కూడా సోషల్ మీడియాలో వైరల్‌గా మారింది. “మనం 100 కోట్లు సాధించాం” అని చెప్పినప్పుడు సమంత ఆనందంతో కన్నీళ్లు పెట్టుకోవడం అభిమానులను కదిలించింది. ఈ సినిమా విజయం తనకు ఎంతో ప్రత్యేకమని, ప్రేక్షకుల ప్రేమే తనకు అతిపెద్ద బహుమతిగా భావిస్తున్నానని సమంత పేర్కొంది.

ఇటీవల వ్యక్తిగత, ఆరోగ్యపరమైన సవాళ్లను ఎదుర్కొన్న సమంతకు ఈ విజయం కెరీర్‌లో అత్యంత కీలకమైన మలుపుగా మారింది. నిర్మాతగా, కథానాయికగా ఒకేసారి బాధ్యతలు తీసుకుని భారీ విజయాన్ని అందుకోవడం ఆమెపై ఇండస్ట్రీలో మరింత గౌరవాన్ని పెంచింది. మహిళా ప్రధాన చిత్రాలకు కూడా భారీ మార్కెట్ ఉందని ఈ సినిమా మరోసారి నిరూపించిందని సినీ విశ్లేషకులు అభిప్రాయపడుతున్నారు.

ప్రస్తుతం ‘మా ఇంటి బంగారం’ విజయంతో సమంత అభిమానులు సంబరాలు జరుపుకుంటున్నారు. సోషల్ మీడియాలో ఆమెకు శుభాకాంక్షలు వెల్లువెత్తుతున్నాయి. ఈ విజయం తర్వాత సమంత నుంచి మరిన్ని మహిళా ప్రధాన చిత్రాలు రావాలని అభిమానులు ఆశాభావం వ్యక్తం చేస్తున్నారు. మొత్తానికి ‘మా ఇంటి బంగారం’ కేవలం బాక్సాఫీస్ విజయమే కాదు.. తెలుగు సినీ పరిశ్రమలో మహిళా కథానాయికల మార్కెట్‌ను మరో స్థాయికి తీసుకెళ్లిన చిత్రంగా నిలిచిపోయింది.