చరిత్రకారుల కథనాల ప్రకారం, 18వ శతాబ్దంలో మాల్దా ప్రాంతం నుంచి ఓ ఋషి కాశీకి వచ్చి కొన్ని మామిడి విత్తనాలను తీసుకువచ్చారు. వాటిని వారణాసిలో నాటి పెంచారు. కొన్నేళ్లలో ఆ చెట్లు ఫలాలను ఇవ్వడం ప్రారంభించాయి. ఆ ఋషి శివాలయంలో పూజలు నిర్వహిస్తూ, పండిన మామిడిని శివునికి నైవేద్యంగా సమర్పించి, అనంతరం భక్తులకు ప్రసాదంగా పంచేవారు. ఆ మామిడి పండు యొక్క అసాధారణ రుచి, మధురమైన సువాసన గురించి నగరమంతా ప్రచారం జరిగింది. క్రమంగా ఈ వార్త అప్పటి కాశీ రాజు చెవిన కూడా పడింది.

సీనియర్ జర్నలిస్ట్ హిమాంశు రాజ్ పాండే తెలిపిన వివరాల ప్రకారం, ఈ మామిడి రుచి గురించి తెలుసుకున్న కాశీ రాజు తన రాజభవనం తోటల్లో కూడా ఈ చెట్లను పెంచాలని నిర్ణయించుకున్నారు. అందుకోసం ఆ ఋషిని సంప్రదించి విత్తనాలు ఇవ్వాలని కోరారు.

ఈ మామిడికి వచ్చిన పేరు వెనుక కూడా ఆసక్తికరమైన కథ ఉంది. ఈ మామిడి చెట్లను నాటిన ఋషి కుంటివాడని చెబుతారు. స్థానిక ప్రజలు ఆయన్ని ప్రేమగా “లంగ్డా బాబా” అని పిలిచేవారు. ఆయన జ్ఞాపకార్థంగానే ఈ మామిడి రకానికి “లంగ్డా మామిడి” లేదా “లంగ్రా మామిడి” అనే పేరు స్థిరపడింది.

ఈ ప్రత్యేక మామిడికి 2023లో బనారసీ లంగ్డా మామిడి పేరుతో భౌగోళిక గుర్తింపు (GI Tag) లభించింది. దీంతో దీని ఖ్యాతి మరింత పెరిగింది. ప్రస్తుతం ఈ మామిడిని గల్ఫ్ దేశాలతో పాటు ప్రపంచంలోని అనేక దేశాలకు ఎగుమతి చేస్తున్నారు. అంతర్జాతీయ మార్కెట్‌లో కూడా దీనికి మంచి డిమాండ్ ఉంది.

ఇతర మామిడి పండ్ల మాదిరిగా పండినప్పుడు పసుపు రంగు లేదంటే నారింజ రంగులోకి మారకుండా.. లంగ్రా మామిడి పండు పూర్తిగా పండిన తర్వాత కూడా బయటికి ఆకుపచ్చ రంగులోనే కనిపిస్తుంది. అయితే లోపల గుజ్జు మాత్రం అత్యంత తీయగా.. సువాసనతో ఉంటుంది. ఒక్కసారి రుచి చూస్తే మళ్లీ మళ్లీ తినాలనిపించేలా ఉండటం దీని ప్రత్యేకత.