ఇటీవలే ఈ సినిమా సెకండ్ షెడ్యూల్ హైదరాబాద్‌లో ప్రారంభమైంది. తాజా సమాచారం ప్రకారం, ప్రస్తుతం ఈ షెడ్యూల్‌లో ఒక హై-వోల్టేజ్ యాక్షన్ సీక్వెన్స్‌ను చిత్రీకరిస్తున్నారు. దీనికోసం ప్రత్యేకంగా కోట్ల రూపాయల ఖర్చుతో ఒక భారీ సెట్ నిర్మించినట్లు తెలుస్తోంది. ప్రముఖ యాక్షన్ కొరియోగ్రాఫర్స్ రామ్ – లక్ష్మణ్ మాస్టర్ల నేతృత్వంలో ఈ భారీ ఫైట్ ఎపిసోడ్ తెరకెక్కుతోంది.

ఈ సినిమాలో చిరంజీవి లుక్ బయటకు లీక్ కాకుండా దర్శకుడు బాబీ చాలా జాగ్రత్తలు తీసుకుంటున్నారు. చిరంజీవిని మునుపెన్నడూ చూడని సరికొత్త యాక్షన్ అవతార్‌లో, ఒక ‘బ్లడీ బెంచ్‌మార్క్’ క్రియేట్ చేసేలా ఈ సినిమాలో చూపించబోతున్నట్లు ఆయన ఇప్పటికే హింట్ ఇచ్చారు. అభిమానుల నిరీక్షణకు తెరదించుతూ, ఆగస్టు 22న మెగాస్టార్ పుట్టినరోజు కానుకగా ఈ సినిమా ఫస్ట్ లుక్ లేదా టైటిల్ టీజర్‌ను విడుదల చేసేందుకు సన్నాహాలు చేస్తున్నారు. ఈ ప్రకటనతో మెగా అభిమానుల్లో అప్పుడే పండగ వాతావరణం నెలకొంది.

ఈ సినిమాలో హీరోయిన్లుగా నివేదా పేతురాజ్, మలయాళ బ్యూటీ అనశ్వర రాజన్ కీలక పాత్రలు పోషిస్తున్నారు. పాన్ ఇండియా స్థాయిలో భారీ చిత్రాలను నిర్మిస్తున్న ‘కేవీఎన్ ప్రొడక్షన్స్’ బ్యానర్‌పై నిర్మాత వెంకట్ కె. నారాయణ ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. ఆయనకు టాలీవుడ్‌లో ఇదే తొలి సినిమా కావడం విశేషం. స్టార్ మ్యూజిక్ డైరెక్టర్ ఎస్. థమన్ ఈ చిత్రానికి సంగీతం అందిస్తున్నారు.