సినీ పరిశ్రమకు చెందిన ప్రముఖ నిర్మాతలు అల్లు అరవింద్, సీనియర్ నటుడు మురళీ మోహన్, సి. అశ్వినీదత్, బన్నీ వాసు, ఏఎం రత్నం తదితరులు కూడా ఈ వేడుకలో తళుక్కుమన్నారు. వారితో పాటు స్టార్ డైరెక్టర్లు వీవీ వినాయక్, శ్రీను వైట్ల, ఎన్. శంకర్, వీర శంకర్, రచయితలు బీవీఎస్ రవి, కోన వెంకట్ తదితరులు కూడా హాజరయ్యారు. మరోవైపు రాజకీయ ప్రముఖులు ఏపీ డిప్యూటీ స్పీకర్ రఘురామ కృష్ణంరాజు, టీడీపీ ఎమ్మెల్యే గంటా శ్రీనివాసరావు, వైసీపీ మాజీ మంత్రి అంబటి రాంబాబు తదితరులు కూడా విచ్చేసి వధూవరులకు ఆశీస్సులు అందజేశారు.

మెహర్ రమేష్‌కు మెగా ఫ్యామిలీతో అత్యంత సన్నిహిత రక్తసంబంధం ఉన్న విషయం తెలిసిందే. చిరంజీవి తల్లి అంజనా దేవికి, మెహర్ రమేష్ తల్లి సొంత అక్కాచెల్లెళ్లు. ఆ చనువుతోనే మెగా కుటుంబంలో జరిగే ప్రతి వేడుకలో మెహర్ ముందుండి అన్నీ చూసుకుంటారు. చిరంజీవి, పవన్ కళ్యాణ్, నాగబాబులతో ఆయనకు చిన్నప్పటి నుంచే విడదీయరాని అనుబంధం ఉంది. ఆ బాండింగ్‌తోనే ఆయన ఇటీవల మెగాస్టార్ చిరంజీవి హీరోగా ‘భోళా శంకర్’ సినిమాను తెరకెక్కించారు.

కెరీర్ పరంగా చూసుకుంటే.. డాషింగ్ డైరెక్టర్ పూరీ జగన్నాథ్ వద్ద దర్శకత్వ శాఖలో శిక్షణ తీసుకున్న మెహర్ రమేష్, కన్నడ పవర్ స్టార్ పునీత్ రాజ్‌కుమార్ హీరోగా వచ్చిన ‘వీరకన్నడిగ’, ‘అజయ్’ చిత్రాలతో డైరెక్టర్‌గా బ్లాక్ బస్టర్స్ అందుకున్నారు. ఆ తర్వాత టాలీవుడ్‌లో ఎన్టీఆర్‌తో ‘కంత్రి’, ప్రభాస్‌తో ‘బిల్లా’, వెంకటేష్‌తో ‘షాడో’ లాంటి యాక్షన్ చిత్రాలను రూపొందించారు. సూపర్ స్టార్ మహేష్ బాబుతోనూ మెహర్‌కు మంచి స్నేహం ఉంది. ఆ స్నేహంతోనే శోభన్ దర్శకత్వంలో మహేష్ నటించిన ‘బాబీ’ సినిమాలో ఆయన స్నేహితుడిగా స్క్రీన్ షేర్ చేసుకోవడం విశేషం.