అంతేకాకుండా సినిమాలో నటించిన ఇతర కళాకారులపై కూడా అల్లు అర్జున్ ప్రశంసలు కురిపించారు. జగపతి బాబు నటన ప్రత్యేకంగా నిలిచిందని పేర్కొంటూ, జాన్వీ కపూర్‌కు తన ప్రేమాభిమానాలను తెలియజేశారు. అలాగే చిత్రానికి పనిచేసిన సాంకేతిక నిపుణులు, నిర్మాతలను అభినందించారు. దర్శకుడు బుచ్చిబాబు సానాను ఉద్దేశించి, “సినిమాలో ప్రతి పాత్రను అద్భుతంగా మలిచి, రామ్ చరణ్‌ను మరింత ఉన్నత స్థాయిలో చూపించినందుకు అభినందనలు. మొత్తం ‘పెద్ది’ బృందానికి శుభాకాంక్షలు” అని రాశారు.

సినిమా విడుదలైన తర్వాత దానిపై స్పందించిన తొలి స్టార్ హీరోగా అల్లు అర్జున్ నిలిచారని సినీ వర్గాలు పేర్కొంటున్నాయి. ఇప్పటివరకు ఇతర ప్రముఖ నటులు ఈ చిత్రంపై బహిరంగంగా స్పందించలేదు.

ఇదిలా ఉంటే, ‘పెద్ది’ విడుదలైన నాటి నుంచి సోషల్ మీడియాలో భారీ చర్చకు దారితీసింది. ముఖ్యంగా మహిళా పాత్రల ప్రదర్శనపై పలువురు ప్రేక్షకులు అభ్యంతరం వ్యక్తం చేశారు. జాన్వీ కపూర్ పాత్రను అవసరానికి మించి గ్లామర్ కోణంలో చూపించారని, మహిళలను చూపించిన తీరు అభ్యంతరకరంగా ఉందని విమర్శలు వచ్చాయి. దీంతో సోషల్ మీడియాలో ట్రోలింగ్ కూడా భారీ స్థాయిలో జరిగింది.

ఈ విమర్శల నేపథ్యంలో దర్శకుడు బుచ్చిబాబు సానా ఇటీవల అధికారిక ప్రకటన విడుదల చేశారు. “సినిమా ప్రేక్షకులను అలరించాలి, ప్రేరేపించాలి, వారితో అనుబంధాన్ని పెంచాలి. ఎట్టి పరిస్థితుల్లోనూ ఎవరినీ అసౌకర్యానికి గురిచేయకూడదు. ‘పెద్ది’లోని కొన్ని సన్నివేశాలపై వచ్చిన అభిప్రాయాలను మేము గౌరవంగా స్వీకరించాం. మహిళల పట్ల నాకు ఎప్పుడూ అత్యంత గౌరవం ఉంది. ఏ మహిళా పాత్రను అవమానించడం లేదా వస్తువుగా చూపించడం మా ఉద్దేశం కాదు. ప్రతి మహిళ గౌరవించబడాలి, విలువ పొందాలి. భవిష్యత్తులో కూడా బలమైన పాత్రలను, విలువలను ప్రతిబింబించే కథలనే చెప్పేందుకు మేము కట్టుబడి ఉంటాం” అని ఆయన స్పష్టం చేశారు.

ఒకవైపు వివాదాలు కొనసాగుతున్నా, మరోవైపు బాక్సాఫీస్ వద్ద ‘పెద్ది’ మంచి వసూళ్లు సాధిస్తూ ముందుకు సాగుతోంది. అల్లు అర్జున్ వంటి స్టార్ హీరో నుంచి వచ్చిన ప్రశంసలు చిత్ర బృందానికి మరింత ఉత్సాహాన్ని ఇచ్చాయని అభిమానులు భావిస్తున్నారు.