ఆంధ్రప్రదేశ్‌లో జరిగిన అసెంబ్లీ ఎన్నికలు జరిగినప్పటి నుండి నేటి వరకు పిఠాపురం నియోజకవర్గం ప్రత్యేకంగా మారింది. దీనికి కారణం అక్కడ టీడీపీ నేత, మాజీ ఎమ్మెల్యే వర్మ కాకుండా పవన్ కల్యాణ్ పోటీ చేయడం విజయం సాధించడంతో పాటు కూటమి ప్రభుత్వం అధికారంలోకి రావడం అన్నీ చకచకా జరిగిపోయాయి. పొత్తులో భాగంగా పిఠాపురం స్థానం పవన్ కల్యాణ్ కి కేటాయించడంతో చంద్రబాబు మాటకు కట్టుబడి వర్మ తన సీటును త్యాగం చేశారు. జనసేనను గెలిపించడానికి తన వంతు కృషి చేశారు. అయితే ఇదంతా పాత కథే అయినప్పటికి తన సీటు త్యాగం చేసిన వర్మకు సొంత కూటమిలోనే ప్రత్యర్ధులు తయారయ్యారు. ఆ పరిస్థితులు ఆయన్ని కొంత ఆగ్రహానికి, మరికొన్ని సార్లు దూకుడు ప్రదర్శించడానికి కారణమయ్యాయి. వర్మ కంటే పవన్ కల్యాణ్ ఎక్కువగా భావించిన టీడీపీ అధినేత వర్మను పలుమార్లు మందలించడమే కాకుండా నియోజకవర్గం ఇన్‌చార్జ్ బాధ్యతల నుండి కూడా తప్పించారు. పదవులు లేక పార్టీ వ్యవహారాలకు దూరంగా పెట్టడంతో వర్మ పిఠాపురం నుండి కాకినాడకు షిప్ట్ అయ్యారు.

వర్మ కాకినాడకు మకాం మార్చడంతో పిఠాపురంలోని ఆయన అభిమానులు, సన్నిహితులు, మద్దతుదారులు ఇప్పుడు నివాసానికి వెళ్లి మరీ కలుస్తున్నారు. ప్రతిరోజు వర్మ నివాసం వద్దకు మహిళలు తెలుగుదేశం పార్టీ నేతలు కార్యకర్తలు వెళ్లడంతో దీని వెనక ఉన్న ఆంతర్యం ఏమిటి అంటూ చర్చ జోరుగా సాగుతుంది. ఇలాంటి సమయంలో నమ్ముకున్న కార్యకర్తల కోసం తాను ఎప్పడూ అండగా ఉంటానని వర్మ చెప్పడమే కాకుండా తన వాళ్లు లేకుండా పుట్టిన రోజు వేడుకలు మాత్రం దేనికి అంటూ బర్త్ డే వేడుకలు జరుపుకోవద్దనుకున్నారు.

ఈ విషయంలో వర్మ వ్యూహం చాలా తెలివిగా ఉంటుందని విశ్లేషకులు అంచనా వేస్తున్నారు. వర్మ కాకినాడ వెళ్లిన అక్కడికి తెలుగు తమ్ముళ్లు వెళ్తున్నారంటే దాని వెనుక ఏదో ఆంతర్యం ఉండే ఉంటుంది అంటూ గుసగుసలాడుతున్నారు. అయితే వర్మ తాను ఎప్పుడూ చంద్రబాబుకు నమ్మిన బంటునే అంటూ చెప్పుకుంటున్నప్పటికి తెరవెనక ఏదైనా జరుగుతుందా అనే సందేహాలు వ్యక్తమవుతున్నాయి. ఏది ఏమైనప్పటికి రాబోయే ఎన్నికల్లో పిఠాపురం నియోజకవర్గంలో వర్మ పాత్ర లేకపోతే కూటమి పార్టీలకు ఇబ్బందులు తప్పవనే ప్రచారం జరుగుతోంది. మరోవైపు ఎవరున్నా లేకపోయినా నూటికి నూరు శాతం గెలిచి తీరుతామంటూ జనసైనికులు హామీ ఇస్తున్నారు. ఏది ఏమైనా ప్రస్తుతం పిఠాపురం రాజకీయం కాకినాడ వైపు మళ్లింది.