ఈ బెదిరింపులను అత్యంత తీవ్రంగా పరిగణించిన ఆస్ట్రేలియా ప్రభుత్వ భద్రతా సంస్థలు మరియు ఆస్ట్రేలియన్ ఫెడరల్ పోలీస్ (AFP) తక్షణమే రంగంలోకి దిగాయి. భద్రతా నిపుణులు ఈ ఆన్‌లైన్ బెదిరింపులకు సంబంధించిన డిజిటల్ ఫుట్‌ప్రింట్స్‌ను పరిశీలించారు. ఈ క్రమంలో సదరు బెదిరింపులకు పాల్పడిన అనుమానితుల యొక్క ఇంటర్నెట్ ప్రొటోకాల్ (IP Address) ను పోలీసులు విజయవంతంగా ట్రేస్ చేసినట్లు సమాచారం. ఈ ఐపీ అడ్రస్ ఆధారంగా బెదిరింపులకు పాల్పడిన వ్యక్తులు ఎక్కడి నుండి ఈ సందేశాలు పంపారు.. దీని వెనుక ఉన్న శక్తులు ఎవరు అనే కోణంలో ఆస్ట్రేలియా దర్యాప్తు సంస్థలు లోతుగా విచారణ జరుపుతున్నాయి.

ప్రధాని నరేంద్ర మోదీ ఆస్ట్రేలియా పర్యటనకు ఎంతో ప్రాధాన్యత ఉంది. అక్కడ భారీ సంఖ్యలో ఉన్న భారతీయ సమాజం ఆయనకు ఘనస్వాగతం పలికేందుకు ఏర్పాట్లు చేస్తోంది. ఇలాంటి తరుణంలో మరణ హెచ్చరికలు రావడంతో ఆస్ట్రేలియా ప్రభుత్వం ప్రధాని మోదీ పర్యటనకు సంబంధించిన భద్రతా ఏర్పాట్లను మరింత కఠినతరం చేసింది. స్థానిక పోలీసులతో పాటు ఫెడరల్ ఏజెన్సీలు అప్రమత్తమై భద్రతా వలయాన్ని సమీక్షించాయి. బెదిరింపులకు పాల్పడిన నిందితులను త్వరలోనే పట్టుకుంటామని ఆస్ట్రేలియా అధికారులు ధీమా వ్యక్తం చేశారు.