ఒక గర్భిణి మహిళ దారుణ హత్యతో ఈ సినిమా కథ ప్రారంభమవుతుంది. క్షుద్రపూజల కోణంలో జరిగినట్టు అనుమానించే ఈ మర్డర్ మిస్టరీ కేసు కొన్ని ఏళ్లపాటు మరుగున పడిపోతుంది. అయితే, ఒక చిన్నారి పాప ‘డాడీ కావాలి’ అంటూ పోలీసులకు ఫిర్యాదు చేయడంతో కథలో ఊహించని మలుపు వస్తుంది. ఆ పాప ఎవరినైతే డాడీ అని పిలుస్తుందో, వారంతా వరుసగా హత్యకు గురవుతుంటారు. ఈ విచిత్రమైన కేసును ఛేదించడానికి రంగంలోకి దిగుతుంది ఒక సిన్సియర్ పోలీస్ ఆఫీసర్ (వరలక్ష్మి శరత్‌కుమార్). ఈ దర్యాప్తు ప్రక్రియలో ఆమె భర్త డాక్టర్ రామ్ (నవీన్ చంద్ర) అసలు స్వరూపం బయటపడుతుంది. అసలు ఈ వరుస హత్యల వెనుక ఉన్న అదృశ్య శక్తి ఎవరు? మూఢనమ్మకాలు, అవినీతి, కర్మ సిద్ధాంతం చుట్టూ అల్లుకున్న ఈ కేసును ఆ పోలీస్ అధికారిణి ఎలా ముగించిందనేదే చిత్ర ముఖ్య కథాంశం.

దర్శకుడు సంజీవ్ మేగోటి “చైన్ రియాక్షన్ ఆఫ్ కర్మ” అనే వైవిధ్యమైన పాయింట్‌ను ఎంచుకుని, దానికి హారర్ ఎలిమెంట్స్‌ను జోడించి కథను గ్రిప్పింగ్‌గా నడిపించారు. ప్రథమార్ధం అంతా మిస్టరీ సీన్లతో సాగగా, ద్వితీయార్ధంలో కథనం వేగం పుంజుకుంటుంది. పోలీస్ ఆఫీసర్‌గా వరలక్ష్మి శరత్‌కుమార్ తన పవర్‌ఫుల్ నటనతో మరోసారి మెప్పించగా, నవీన్ చంద్ర గంభీరమైన పాత్రలో ఒదిగిపోయారు. కృష్ణసాయి నటన, అలాగే చిత్రంలో సూపర్‌స్టార్ కృష్ణకు నివాళిగా డిజైన్ చేసిన ప్రత్యేక గీతం అభిమానులను ఎంతగానో ఆకట్టుకుంటుంది. శ్రీనివాస్ రెడ్డి, సప్తగిరిల కామెడీ కాస్త రిలీఫ్ ఇస్తుంది. ఎక్కడో చోట బోరింగ్ అనిపించినా మొత్తంగా అయితే అందరికీ కనెక్ట్ అయ్యే కథ ఇది.