Last Updated:
Railway Operation | దేశవ్యాప్తంగా అక్రమ నగదు రవాణాపై నిఘా కట్టుదిట్టం చేస్తున్న రైల్వే భద్రతా దళాలు మరో భారీ విజయాన్ని నమోదు చేశాయి. సాధారణ తనిఖీల మధ్య అనుమానాస్పదంగా కనిపించిన ఓ ప్రయాణికుడి వ్యవహారం చివరకు కోట్ల రూపాయల నగదు స్వాధీనానికి దారితీసింది. దేవగిరి ఎక్స్ప్రెస్లో వెలుగులోకి వచ్చిన ఈ ఘటన ప్రస్తుతం సంచలనంగా మారింది.
అది ముంబై నుంచి సికింద్రాబాద్ వస్తున్న రైలు. రాత్రి వేళ ప్రయాణికులతో కిక్కిరిసిన దేవగిరి ఎక్స్ప్రెస్ వేగంగా దూసుకెళ్తోంది. అంతా సాధారణంగానే కనిపించింది. కానీ ఆ జనసందోహంలో ఒక వ్యక్తి ప్రవర్తన మాత్రం ఆర్పీఎఫ్ అధికారుల దృష్టిని ఆకర్షించింది. ఆ ప్రయాణికుడు అనుమానాస్పదంగా కనిపించాడు. అనుమానాస్పద హావభావాలు, అసహజమైన కంగారు, వెంటనే అప్రమత్తమైన హైదరాబాద్ డివిజన్ రైల్వే ప్రొటెక్షన్ ఫోర్స్. తనిఖీ చేస్తే అసలు విషయం బయటపడింది. దేవగిరి ఎక్స్ప్రెస్లో సంచలనం రేపిన ఘటన ఇది. ఆపరేషన్ సతర్క్లో భాగంగా మే 26న హైదరాబాద్ డివిజన్ రైల్వే ప్రొటెక్షన్ ఫోర్స్ అధికారులు 17057 నెంబర్ గల దేవగిరి ఎక్స్ప్రెస్ రైలులో తనిఖీలు నిర్వహించారు. ఒక వ్యక్తి ప్రవర్తన అధికారులకు అనుమానం కలిగించింది. అతను కంగారు పడుతున్న తీరు గమనించిన క్రైమ్ ప్రివెన్షన్ అండ్ డిటెక్షన్ స్క్వాడ్ (సి.పి.డి.ఎస్) సిబ్బంది వెంటనే తనిఖీలు చేపట్టారు. ఈ తనిఖీల్లో రెండు సంచుల్లో దాచిపెట్టిన భారీ మొత్తంలో నగదు బయటపడింది. అధికారులు లెక్కించగా ఆ మొత్తం ఏకంగా రూ.1,22,70,000గా తేలింది.
ప్రాథమిక విచారణలో ఈ నగదును ముంబైలోని జావేరి బజార్ నుంచి సికింద్రాబాద్కు తరలిస్తున్నట్లు వెల్లడైంది. వెంటనే అనుమానితుడిని అదుపులోకి తీసుకున్న అధికారులు, నగదుతో సహా దర్యాప్తు నిమిత్తం జీఆర్పీకి అప్పగించారు. అలాగే ఈ వ్యవహారాన్ని ఆదాయపు పన్ను శాఖ, ఇంటెలిజెన్స్ బ్యూరోలకు కూడా నివేదించారు. ఇక కేసు దర్యాప్తులో భాగంగా ఇంటర్ఆపరేబుల్ క్రిమినల్ జస్టిస్ సిస్టమ్ (ఐ.సి.జె.ఎస్), ఆర్పీఎఫ్ సైబర్ సెల్ డిజిటల్ విశ్లేషణను కొనసాగిస్తున్నాయి. ఈ భారీ నగదు స్వాధీనం, ఇంటెలిజెన్స్ ఆధారిత రైల్వే పోలీసింగ్లో హైదరాబాద్ డివిజన్ సాధించిన మరో కీలక విజయంగా నిలిచింది.
ఆపరేషన్ సతర్క్ మాత్రమే కాదు, ఆపరేషన్ నార్కోస్ ద్వారా కదులుతున్న రైలులో రూ.41.5 లక్షల మాదక ద్రవ్య రాకెట్ను ఛేదించింది ఆర్పీఎఫ్ హైదరాబాద్. ‘ఆపరేషన్ నార్కోస్’ లో భాగంగా రైల్వే స్టేషన్లు, సీసీటీవీ నెట్వర్క్ల వ్యాప్తంగా ఒక క్రైమ్ థ్రిల్లర్ లాగా సాగిన ఉత్కంఠభరితమైన ఇంటెలిజెన్స్ ఆధారిత ఆపరేషన్లో, రైల్వే ప్రొటెక్షన్ ఫోర్స్ హైదరాబాద్ డివిజన్ సోమవారం మహారాష్ట్ర, ఒడిశా, తెలంగాణ రాష్ట్రాలకు సంబంధించిన ఒక ప్రధాన అంతర్రాష్ట్ర మాదకద్రవ్యాల ముఠాను ఛేదించింది. ఈ ‘ఆపరేషన్ నార్కోస్’ కింద వేగంగా పలు ప్రాంతాల్లో నిర్వహించిన ఆపరేషన్లో, రూ.41.5 లక్షల విలువైన 83 కిలోల గంజాయిని స్వాధీనం చేసుకుని, నలుగురు నిందితులను అరెస్టు చేసింది.
రైలు నం 20809 నాగావళి ఎక్స్ప్రెస్లో ఈ కీలక విజయం నమోదైంది. సాధారణ నిఘా తనిఖీల సమయంలో, హైదరాబాద్ డివిజన్కు చెందిన అత్యంత అప్రమత్తమైన సి.పి.డి.ఎస్ బృందం ఒక ప్రయాణికుడి కంగారు కదలికలు, తప్పించుకునే ధోరణి వంటి అసాధారణ విషయాలను గమనించింది. మొదట కేవలం ఒక ప్రయాణికుడి తనిఖీగా భావించిన ఈ ఘటన, త్వరలోనే ఇటీవలి నెలల్లో డివిజన్ చేపట్టిన అత్యంత ముఖ్యమైన మాదకద్రవ్యాల నిరోధక కేసులలో ఒకటిగా మారింది.
ఆర్పిఎఫ్ సిబ్బంది అనుమానితుడిని అడ్డగించి, అతని వద్ద దాచి ఉంచిన రూ.24 లక్షల విలువైన 48 కిలోల గంజాయిని స్వాధీనం చేసుకున్నారు. అయితే కథ అంతటితో ముగియలేదు. విచారణ సమయంలో, అనుమానితుడు ఒక పెద్ద మాదకద్రవ్యాల అక్రమ రవాణా ముఠాలోని ఒక పాత్రధారి మాత్రమేనని దర్యాప్తు చేస్తున్న అధికారులకు అనుమానం కలిగింది. నిమిషాల వ్యవధిలోనే, సి.పి.డి.ఎస్ నెట్వర్క్ వ్యాప్తంగా నిఘా సమాచారవ్యాప్తి ప్రారంభమైంది. మరో సహచరుడు సరుకులో కొంత భాగంతో అప్పటికే దిగిపోయినట్లు సమాచార విశ్లేషణలో నిర్ధారణ కావడంతో, చర్లపల్లిలో సమాంతర ఆపరేషన్ ప్రారంభించబడింది.
అనంతరం, సీసీటీవీ విశ్లేషణలు, కదలికల ట్రాకింగ్తో కూడిన అత్యంత వేగవంతమైన డిజిటల్ గాలింపు చర్యలు చేపట్టగా, ఒక మహిళతో సహా మరో ముగ్గురు నిందితులు నగరంలోకి పారిపోకముందే ఆర్పీఎఫ్ విజయవంతంగా వారిని పట్టుకుంది.
Hyderabad,Telangana
