ఈ నేపథ్యంలో చిత్ర యూనిట్ దేశవ్యాప్తంగా ముమ్మరంగా ప్రమోషన్స్ నిర్వహిస్తోంది. భోపాల్, బెంగళూరు నగరాల్లో సందడి చేసిన అనంతరం, గురువారం దేశ రాజధాని దిల్లీలో ఒక గ్రాండ్ ప్రెస్ కాన్ఫరెన్స్ నిర్వహించారు. ఈ కార్యక్రమంలో రామ్ చరణ్, జాన్వీ కపూర్, దివ్యేందు శర్మ, బొమన్ ఇరానీ, సంగీత దర్శకుడు ఏఆర్ రెహమాన్ పాల్గొన్నారు.

పశ్చిమ బెంగాల్‌లోని ఒక చిన్న గ్రామానికి చెందిన ‘మహ్మద్’ అనే ఫుట్‌బాల్ క్రీడాకారుడు అంతర్జాతీయ స్థాయిలో దేశం తరఫున ఆడి, తన గ్రామానికి ఎలా గుర్తింపు తెచ్చాడో ప్రధాని వివరించారని చరణ్ పేర్కొన్నారు. నేడు ఆ ఒక్క వ్యక్తి వల్ల ఆ పల్లెటూరు నుండి 85 మందికి పైగా అథ్లెట్లు తయారయ్యారని మోదీ చెప్పారన్నారు. ఒకే ఒక్క వ్యక్తి సమాజంలో ఎంతటి విప్లవాత్మక మార్పు తీసుకురాగలడు అనేదానికి ఈ కథ నిదర్శనమని, ‘పెద్ది’ సినిమాలో తన పాత్ర కూడా సరిగ్గా అలాంటి స్ఫూర్తితోనే, గ్రామీణ యువత ఆకాంక్షల చుట్టూ సాగుతుందని వెల్లడించారు. ఈ సినిమాలో చరణ్ క్రికెట్, కుస్తీ, రన్నింగ్ వంటి బహుముఖ క్రీడల్లో రాణించే ఒక పల్లెటూరి యువకుడిగా కనిపించనున్నారు. ఇదే సమయంలో సినిమాలో తన డ్యాన్స్ గురించి విలేకరులు అడగ్గా.. “నిర్మాత మంచి పారితోషికం ఇచ్చారు, కాబట్టి డ్యాన్స్ ఇరగదీశాను” అంటూ చరణ్ చమత్కరించి నవ్వులు పూయించారు.

హీరోయిన్ జాన్వీ కపూర్ మాట్లాడుతూ రామ్ చరణ్ వ్యక్తిత్వాన్ని కొనియాడారు. తెరపై ఎంతో ఉద్వేగంగా కనిపించే చరణ్, నిజ జీవితంలో చాలా కూల్‌గా మరియు డౌన్-టు-ఎర్త్ ఉంటారని చెప్పారు. సీనియర్ నటుడు బొమన్ ఇరానీతో కలిసి నటించాలనే తన కల ఈ చిత్రంతో నెరవేరిందని ఆనందం వ్యక్తం చేశారు. అలాగే, దర్శకుడు బుచ్చిబాబు సానా రాసుకున్న భావోద్వేగపూరితమైన కథను, ఆయన విజన్‌ను తాను పూర్తిగా నమ్మి ఫాలో అయ్యానని, చిత్ర యూనిట్ అంతా ఆయనకు పెద్ద ఫ్యాన్స్ అయిపోయామని జాన్వీ పేర్కొన్నారు.

ఈ చిత్రానికి ఆర్. రత్నవేలు సినిమాటోగ్రఫీ అందించగా, జూన్ 4న తెలుగుతో పాటు హిందీ, తమిళం, కన్నడ, మలయాళ భాషల్లో ఈ చిత్రం బాక్సాఫీస్ వద్ద సరికొత్త రికార్డులు సృష్టించడానికి సిద్ధమవుతోంది.