ఈ బ్లాక్‌బస్టర్ చిత్రానికి సంబంధించిన శాటిలైట్ హక్కులను ప్రముఖ ఎంటర్‌టైన్‌‌మెంట్ ఛానెల్ ‘జీ తెలుగు’ (Zee Telugu) భారీ ధరకు సొంతం చేసుకుంది. తాజాగా ఈ మూవీ వరల్డ్ టెలివిజన్ ప్రీమియర్ తేదీ, సమయాన్ని ఛానెల్ నిర్వాహకులు అధికారికంగా ప్రకటించారు. అక్టోబర్ 11వ తేదీ (ఆదివారం) సాయంత్రం 5:30 గంటలకు ‘పెద్ది’ జీ తెలుగులో గ్రాండ్‌గా ప్రసారం కానుంది. వీకెండ్‌ కావడంతో, ముఖ్యంగా ఆదివారం సాయంత్రం అందరూ ఇంట్లో ఉండే ప్రైమ్ టైమ్‌లో ఈ సినిమాను టెలికాస్ట్ చేస్తుండటంతో కచ్చితంగా భారీ టీఆర్పీ (TRP) రేటింగ్స్ నమోదు చేస్తుందని ట్రేడ్ వర్గాలు అంచనా వేస్తున్నాయి.

‘పెద్ది’ సినిమా విషయానికి వస్తే, ఇందులో రామ్ చరణ్ మునుపెన్నడూ లేని విధంగా ఒక పూర్తిస్థాయి మాస్, డీ-గ్లామరస్ పాత్రలో నటించి మెప్పించారు. క్రీడల నేపథ్యంలో సాగే ఎమోషనల్ జర్నీకి చరణ్ అద్భుతమైన నటన ప్రాణం పోసింది. తొలిసారిగా టాలీవుడ్ ఎంట్రీ ఇచ్చిన జాన్వీ కపూర్ తన అందంతో పాటు నటనతోనూ ఆకట్టుకుని తెలుగు ప్రేక్షకులకు చేరువైంది. గ్రామీణ వాతావరణం, అక్కడి మనుషుల భావోద్వేగాలు, క్రీడల్లోని రాజకీయాలు, ముఖ్యంగా హృదయాన్ని హత్తుకునే కుటుంబ బంధాలను దర్శకుడు బుచ్చిబాబు సానా అత్యద్భుతంగా తెరపై ఆవిష్కరించారు.

ఇక ఆస్కార్ విజేత, లెజెండరీ సంగీత దర్శకుడు ఏ.ఆర్. రెహమాన్ అందించిన సంగీతం ఈ సినిమాకు ప్రధాన బలంగా నిలిచింది. ఆయన స్వరపరిచిన పాటలు చార్ట్‌బస్టర్స్‌గా నిలవగా, భావోద్వేగపూరిత సన్నివేశాల్లో, స్పోర్ట్స్ యాక్షన్ ఎపిసోడ్స్ లో ఆయన ఇచ్చిన నేపథ్య సంగీతం (BGM) సినిమాను మరో స్థాయికి తీసుకెళ్లింది. వృద్ధి సినిమాస్ పతాకంపై అత్యంత భారీ నిర్మాణ విలువలతో ఈ సినిమాను నిర్మించారు. థియేట్రికల్, డిజిటల్ మాధ్యమాల్లో తన సత్తా చాటిన ‘పెద్ది’.. ఇప్పుడు అక్టోబర్ 11న బుల్లితెరపై ఏ మేర రెస్పాన్ అందుకుంటుందో చూడాలి మరి.