గత కొద్ది రోజులుగా ఈ సినిమా ట్రైలర్ కు సంబంధించి నెట్టింట ఓ వార్త విపరీతంగా వైరల్ అవుతోంది. ప్రముఖ గ్లోబల్ పాప్-కల్చర్ ఈవెంట్ ‘శాన్ డియాగో కామిక్-కాన్’ (Comic-Con) వేదికగా జూలై 18న ఈ చిత్ర గ్లింప్స్ లేదా ట్రైలర్ ను లాంచ్ చేస్తారని బలమైన పుకార్లు వినిపించాయి. అయితే, తాజాగా ఈ వార్తలపై చిత్ర బృందం స్పందించి క్లారిటీ ఇచ్చింది. ఆ పుకార్లకు అధికారికంగా చెక్ పెడుతూ.. ‘రామాయణ’ గ్రాండ్ ట్రైలర్ లాంచ్ ప్రీమియర్ ను జూలై 24న గ్రాండ్ గా నిర్వహించనున్నట్లు మేకర్స్ కన్ఫర్మ్ చేశారు.

ఈ ట్రైలర్ అనౌన్స్ మెంట్ సందర్భంగా మేకర్స్ వదిలిన పోస్టర్ ప్రేక్షకులను విశేషంగా ఆకట్టుకుంటోంది. అయోధ్య నగరం నుండి శ్రీరాముడు, సీతాదేవి, లక్ష్మణుడు తమ 14 ఏళ్ల వనవాసానికి బయలుదేరుతున్న ఘట్టాన్ని ఈ పోస్టర్ లో అద్భుతంగా ఆవిష్కరించారు. ఆ పోస్టర్ లోని ఎమోషన్, బ్యాక్ గ్రౌండ్ లోని అయోధ్య సెటప్ చూస్తుంటే సినిమా ఏ స్థాయిలో ఉండబోతుందోనని అంచనాలు అమాంతం పెరిగిపోతున్నాయి.

ఈ సినిమాకి సంబంధించిన మరో ఆసక్తికరమైన సాంకేతిక విషయం ఏమిటంటే.. భారతీయ సినిమా చరిత్రలో మొదటిసారిగా పూర్తిగా ఐమ్యాక్స్ (IMAX) ఫార్మాట్ లో చిత్రీకరించబడుతున్న సినిమా ఇది. ఆస్కార్ అవార్డులు గెలుచుకున్న ప్రముఖ విజువల్ ఎఫెక్ట్స్ సంస్థ DNEG (నమిత్ మల్హోత్రా) ఈ సినిమాకు సహ నిర్మాతగా వ్యవహరిస్తూ, అవతార్, మార్వెల్ సినిమాల రేంజ్ లో గ్రాఫిక్స్ అందిస్తున్నారు. అంతేకాకుండా, ఈ ఎపిక్ మూవీలో కేజీఎఫ్ స్టార్ యష్ రావణాసురుడిగా, బాలీవుడ్ సీనియర్ నటుడు సన్నీ డియోల్ హనుమంతుడిగా, లారా దత్తా కైకేయిగా కనిపించనున్నారని సమాచారం.