విశ్వసనీయ వర్గాల సమాచారం ప్రకారం, ప్రముఖ దర్శకుడు గౌతమ్ తిన్నమూరి దర్శకత్వంలో తెరకెక్కనున్న ఈ బయోపిక్‌లో ఎంఎస్ సుబ్బులక్ష్మి పాత్ర కోసం రష్మిక మందన్నాను ఎంపిక చేసినట్లు తెలుస్తోంది. ఇటీవల ఆమె నివాసంలో ప్రత్యేకంగా లుక్ టెస్ట్ నిర్వహించినట్లు ప్రచారం జరుగుతోంది. అయితే ఈ విషయంపై చిత్ర బృందం నుంచి ఇప్పటివరకు ఎలాంటి అధికారిక ప్రకటన వెలువడలేదు.

ఈ బయోపిక్‌కు సంబంధించి గతంలో పలువురు హీరోయిన్ల పేర్లు వినిపించాయి. మొదట ఈ పాత్రలో సాయి పల్లవి నటించనున్నట్లు వార్తలు వచ్చాయి. అంతేకాకుండా ఆమె కర్ణాటక సంగీతంలో ప్రత్యేక శిక్షణ తీసుకుంటున్నట్లు ప్రచారం జరిగింది. పాత్రలో పూర్తిగా ఒదిగిపోవడం కోసం ఎంఎస్ సుబ్బులక్ష్మికి సంబంధించిన వీడియోలు, పాత రికార్డింగ్స్‌ను అధ్యయనం చేస్తున్నట్లు కూడా అప్పట్లో కథనాలు వెలువడ్డాయి.

అయితే ఆ తర్వాత ఈ ప్రాజెక్టులో మరో నటి రుక్మిణి వసంత్ పేరు కూడా వినిపించింది. సాయి పల్లవి స్థానంలో రుక్మిణి వసంత్‌ను ఎంపిక చేసినట్లు వార్తలు వచ్చాయి. ప్రస్తుతం ఆమె తెలుగు సినీ పరిశ్రమలోకి గ్రాండ్ ఎంట్రీ ఇవ్వడానికి సిద్ధమవుతున్న నేపథ్యంలో ఈ వార్తలు మరింత ప్రాధాన్యత సంతరించుకున్నాయి.

ఇప్పుడు తాజాగా రష్మిక మందన్నా పేరు తెరపైకి రావడంతో ఈ బయోపిక్‌పై అంచనాలు మరింత పెరిగాయి. జాతీయ స్థాయిలో గుర్తింపు పొందిన రష్మిక, ఈ పాత్రకు ఎంపికైతే ఆమె కెరీర్‌లో ఇది మరో ప్రతిష్టాత్మక ప్రాజెక్ట్‌గా నిలిచే అవకాశం ఉంది. ముఖ్యంగా ఎంఎస్ సుబ్బులక్ష్మి వంటి సంగీత దిగ్గజం పాత్రను పోషించడం ఏ నటికైనా సవాలుతో కూడుకున్న విషయమే.

ఇదిలా ఉండగా, రష్మిక ప్రస్తుతం తన సినిమాలతో బిజీగా ఉంది. ఇటీవల విడుదలైన కాక్‌టెయిల్ 2 ట్రైలర్‌కు ప్రేక్షకుల నుంచి విశేష స్పందన రావడంతో ఆమె సోషల్ మీడియా వేదికగా అభిమానులకు కృతజ్ఞతలు తెలిపింది. ట్రైలర్‌కు లభించిన ప్రేమాభిమానాలు తనకు ఎంతో ఆనందాన్ని ఇచ్చాయని పేర్కొంది.

అయితే ఎంఎస్ సుబ్బులక్ష్మి బయోపిక్‌లో నిజంగా ఎవరు నటించబోతున్నారు? రష్మికా, సాయి పల్లవినా లేదా రుక్మిణి వసంతా? అనే ప్రశ్నకు సమాధానం రావాలంటే చిత్ర బృందం నుంచి అధికారిక ప్రకటన వచ్చే వరకు వేచి చూడాల్సిందే.