భారీ లక్ష్య ఛేదనతో బ్యాటింగ్‌కు దిగిన గుజరాత్ టైటాన్స్ ఏ దశలోనూ లక్ష్యం వైపు సాగలేదు. సాయి సుదర్శన్ (14), శుబ్‌మన్ గిల్ (2), సింధు (5), సుందర్ (8), హోల్డర్ (0) అలా వచ్చి ఇలా వెళ్లారు. డఫీ బౌలింగ్‌లో ఆడేందుకు గుజరాత్ బ్యాటర్లు తెగ ఇబ్బంది పడ్డారు. ఆర్సీబీ 2025లో చాంపియన్‌గా నిలిచింది. ఇప్పుడు ఫైనల్ చేరింది. 2018 నుంచి క్వాలిఫయర్ 1 విజేతే ఐపీఎల్ టైటిల్ నెగ్గుతూ వస్తోంది. అదే జరిగితే ఈసారి కప్పు ఆర్సీబీదే.

అంతకుముందు టాస్ ఓడి తొలుత బ్యాటింగ్‌కు దిగిన ఆర్సీబీ 20 ఓవర్లలో 5 వికెట్లకు 254 పరుగులు చేసింది. కెప్టెన్ రజత్ పటిధార్ (33 బంతుల్లో 93 నాటౌట్; 5 ఫోర్లు, 9 సిక్సర్లు) రెచ్చిపోయాడు. విరాట్ కోహ్లీ (43), పడిక్కల్ (30), కృనాల్ పాండ్యా (43) రాణించారు. ఫలితంగా ఆర్సీబీ భారీ స్కోరును సాధించింది. కగిసో రబడ, హోల్డర్‌లకు చెరో 2 వికెట్లు దక్కాయి.ప్రసిధ్ కృష్ణకు ఒక వికెట్ లభించింది. ప్లే ఆఫ్స్‌లో ఇదే అత్యధిక స్కోరు కావడం విశేషం.

టాస్ ఓడి బ్యాటింగ్‌కు దిగిన ఆర్సీబీకి శుభారంభం లభించింది.  పవర్ ప్లే ముగిసే సరికి వికెట్ నష్టపోయి 76 పరుగులు చేసింది. వెంకటేశ్ అయ్యర్ 7 బంతుల్లో 19 పరుగులు చేసి అవుటయ్యాడు. విరాట్ కోహ్లీ, దేవదత్ పడిక్కల్ దంచి కొట్టారు. ఫలితంగా ఆర్సీబీ తొలి 6 ఓవర్లలో అదరగొట్టింది. అయితే 9వ ఓవర్లో బౌలింగ్‌కు వచ్చిన జేసన్ హోల్డర్ 3 బంతుల్లో కోహ్లీ, పడిక్కల్‌లను అవుట్ చేశాడు. దాంతో ఆర్సీబీ 7 నుంచి 10 ఓవర్ల మధ్య కేవలం 23 పరుగులు చేసింది.

అయితే ఇక్కడి నుంచి పరిస్థితులు మారిపోయాయి. క్రీజులోకి వచ్చిన రజత్ పటిధార్ ఆకాశమే హద్దుగా చెలరేగి పోయాడు. సిక్సర్ల వర్షం కురిపించాడు. అదే సమయంలో గుజరాత్ టైటాన్స్ పలు క్యాచ్‌లను డ్రాప్ చేసింది. రజత్ పటిదార్ ఇచ్చిన క్యాచ్‌ను రబడ మిస్ చేశాడు. అనంతరం అతడు రెచ్చిపోయి ఆడాడు. కృనాల్ పాండ్యా కూడా అతడికి చక్కటి సహకారం అందించాడు. ఫలితంగా ఆర్సీబీ చివరి 10 ఓవర్లలో ఏకంగా 155 పరుగులు చేసింది. ఫలితంగా క్వాలిఫయర్ 1 పోరులో తిరుగులేని టార్గెట్‌ను గుజరాత్ టైటాన్స్ ముందు ఉంచింది.