‘అర్జున్ రెడ్డి’, ‘కబీర్ సింగ్’, ‘యానిమల్’ వంటి కల్ట్ బ్లాక్‌బస్టర్ చిత్రాలతో పాన్-ఇండియా దర్శకుడిగా తిరుగులేని ఇమేజ్ సొంతం చేసుకున్నారు సందీప్ రెడ్డి వంగా. ఆయన సినిమాల్లో ఉండే రఫ్ అండ్ ఇంటెన్స్ ఎమోషన్స్‌కు యూత్‌లో విపరీతమైన క్రేజ్ ఉంది. ప్రస్తుతం ఆయన రెబల్ స్టార్ ప్రభాస్‌తో ‘స్పిరిట్’ అనే భారీ పాన్-వరల్డ్ ప్రాజెక్ట్‌ను పట్టాలెక్కించే పనిలో బిజీగా ఉన్నారు. ప్రభాస్ ఇందులో పవర్‌ఫుల్ పోలీస్ ఆఫీసర్‌గా కనిపించనుండటంతో అంచనాలు ఆకాశాన్ని తాకుతున్నాయి. ఇలాంటి భారీ యాక్షన్ సినిమాపై ప్రపంచవ్యాప్తంగా ఫోకస్ ఉన్న తరుణంలో, సందీప్ వంగా అకస్మాత్తుగా ఒక చిన్న బడ్జెట్ యూత్ ఫుల్ మ్యూజికల్ రొమాంటిక్ కామెడీ చిత్రాన్ని ప్రకటించి ట్రేడ్ వర్గాలను సైతం ఆశ్చర్యపరిచారు.

సందీప్ రెడ్డి వంగా సోదరుడు ప్రణయ్ రెడ్డి వంగా గతంలో ‘అర్జున్ రెడ్డి’ చిత్రాన్ని భద్రకాళి పిక్చర్స్ బ్యానర్‌పై నిర్మించి ట్రెండ్ సెట్ చేశారు. ఇప్పుడు అదే ప్యాషనేట్ ప్రొడక్షన్ హౌస్ నుంచి వస్తున్న రెండో చిత్రం ‘రోమాంచకం’ కావడం విశేషం. ఈ సినిమా కోసం వంగా బ్రదర్స్ టాలెంటెడ్ యంగ్ టీమ్‌ను ఎంచుకున్నారు. ‘మేం ఫేమస్’ సినిమాతో నటుడిగా, దర్శకుడిగా కుర్రాళ్లను ఆకట్టుకున్న సుమంత్ ప్రభాస్ ఇందులో హీరోగా నటిస్తుండగా, అనంతిక సనిల్ కుమార్ హీరోయిన్‌గా నటిస్తోంది. నూతన దర్శకుడు వేణుగోపాల్ రెడ్డి టేకింగ్‌పై సందీప్ వంగా పూర్తి నమ్మకం వ్యక్తం చేయడంతో ఈ చిత్రంపై పరిశ్రమలో భారీ క్యూరియాసిటీ నెలకొంది. డిజిటల్ దిగ్గజం నెట్‌ఫ్లిక్స్ ఇప్పటికే దీని డిజిటల్ హక్కులను సొంతం చేసుకోవడం సినిమా బిజినెస్ రేంజ్‌ను తెలియజేస్తోంది.