Last Updated:
రష్యా మీడియా, సోషల్ మీడియాలో వైరల్ అవుతున్న కొన్ని వీడియోల ప్రకారం.. ఆ బాంబర్ విమానం అంగారా నది సమీపంలోని అటవీ ప్రాంతంలో ముక్కునేలకి గుచ్చి కూలిపోతూ, ఆకాశంలోకి దట్టమైన పొగను పంపడం కనిపించింది.
Russia Bomber: రష్యా వైమానిక దళానికి చెందిన అత్యంత శక్తివంతమైన ‘Tu-22M3’ సుదూర శ్రేణి వ్యూహాత్మక బాంబర్ (Strategic Bomber) విమానం సోమవారం ఘోర ప్రమాదానికి గురైంది. సైబీరియాలోని ఇర్కుట్స్క్ (Irkutsk) ప్రాంతంలో ఒక సాధారణ శిక్షణ ఫ్లైట్ (Training flight) లో ఉండగా ఈ భారీ విమానం కుప్పకూలిపోయింది. అయితే, విమానం భూమిని ఢీకొట్టడానికి ముందే అందులోని నలుగురు సిబ్బంది (పైలట్లు) పారాచూట్ల సహాయంతో సురక్షితంగా బయటపడ్డారు. రష్యా మీడియా, సోషల్ మీడియాలో వైరల్ అవుతున్న కొన్ని వీడియోల ప్రకారం.. ఆ బాంబర్ విమానం అంగారా నది సమీపంలోని అటవీ ప్రాంతంలో ముక్కునేలకి గుచ్చి కూలిపోతూ, ఆకాశంలోకి దట్టమైన పొగను పంపడం కనిపించింది.
ప్రమాదం జరిగిన వెంటనే స్పందించిన రక్షణ మంత్రిత్వ శాఖ కీలక ప్రకటన చేసింది. “విమానం కూలిపోయే ముందే నలుగురు సిబ్బంది సురక్షితంగా బయటపడ్డారు. పైలట్లకు స్వల్ప గాయాలవడంతో వారిని ఆసుపత్రికి తరలించారు. ప్రస్తుతం వారి ప్రాణాలకు ఎలాంటి ముప్పు లేదు, ఆరోగ్యం స్థిరంగా ఉంది” అని ఇంటర్ఫాక్స్ వార్తా సంస్థ రక్షణ మంత్రిత్వ శాఖను ఉటంకిస్తూ పేర్కొంది.
ప్రమాద సమయంలో విమానంలో ఎలాంటి యుద్ధ సామగ్రి (Combat load) లేదని, అలాగే ఇది జనవాసాలు లేని అటవీ ప్రాంతంలో పడటం వల్ల భూమిపై ఎలాంటి ఆస్తి నష్టం లేదా ప్రాణ నష్టం జరగలేదని అధికారులు ధృవీకరించారు. క్రాష్ సైట్ వద్ద చెలరేగిన మంటలను ఆర్పివేయడానికి అగ్నిమాపక సిబ్బందిని మోహరించారు.
ఇర్కుట్స్క్ గవర్నర్ ఇగోర్ కొబ్జెవ్ మాట్లాడుతూ.. ఘటనా స్థలంలో అత్యవసర సహాయక బృందాలు పనిచేస్తున్నాయని, ఈ ప్రమాదంపై ఉన్నత స్థాయి దర్యాప్తు ప్రారంభమైందని తెలిపారు. ప్రాథమిక సమాచారం ప్రకారం.. విమాన ఇంజన్ వైఫల్యం (Engine failure) చెందడమే ఈ ఘోర ప్రమాదానికి కారణమని భావిస్తున్నారు.
చరిత్ర: ఇది సోవియట్ యూనియన్ కాలం నాటి సూపర్సోనిక్ బాంబర్ విమానం. దీని అసలు రూపానికి అత్యాధునిక హంగులు జోడించి ‘Tu-22M3’ వెర్షన్గా మార్చారు. నాటో (NATO) కూటమి దీనికి “బ్యాక్ఫైర్” (Backfire) అని కోడ్ నేమ్ పెట్టింది.
ఆయుధాలు: ‘బులెటిన్ ఆఫ్ ది అటామిక్ సైంటిస్ట్స్’ ప్రకారం.. ఈ విమానం గాల్లోంచి ప్రయోగించే ‘Kh-22’ క్రూయిజ్ క్షిపణులతో పాటు, ధ్వని కంటే ఐదింతల వేగంతో దూసుకెళ్లే అత్యంత ప్రమాదకరమైన ‘కింజాల్’ (Kinzhal / Dagger) హైపర్సోనిక్ క్షిపణులను కూడా మోసుకెళ్లగలదు. రష్యా ఈ శక్తివంతమైన బాంబర్ విమానాలను గతంలో సిరియాలో మరియు ప్రస్తుతం ఉక్రెయిన్తో జరుగుతున్న యుద్ధంలో తన సైనిక అవసరాల కోసం విస్తృతంగా ఉపయోగించింది.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
