తన అధికారిక ఎక్స్ ఖాతా ద్వారా సమంతకు ప్రత్యేకంగా శుభాకాంక్షలు తెలిపిన రామ్ చరణ్, ఆమెను అసాధారణమైన ధైర్యం, గౌరవం, ఆత్మవిశ్వాసం కలిగిన మహిళగా అభివర్ణించారు. “ప్రియమైన సమంత.. నువ్వు ఎప్పుడూ అద్భుతమైన బలం, హుందాతనం, దృఢమైన నమ్మకాలతో ముందుకు సాగే మహిళవే” అంటూ ప్రశంసించారు. అలాగే ‘మా ఇంటి బంగారం’ గురించి మంచి విషయాలు వింటున్నానని, ఈ విజయం పూర్తిగా అర్హమైనదేనని పేర్కొంటూ చిత్ర బృందానికి అభినందనలు తెలియజేశారు.

రామ్ చరణ్ చేసిన ఈ ప్రశంసలకు సమంత కూడా భావోద్వేగంతో స్పందించింది. “ధన్యవాదాలు రామ్ చరణ్. మీ మాటలు నాకు, ‘మా ఇంటి బంగారం’ టీమ్‌కు ఎంతో విలువైనవి” అంటూ తన ఆనందాన్ని పంచుకుంది. ఇద్దరి మధ్య ఉన్న స్నేహం, పరస్పర గౌరవం అభిమానులను ఆకట్టుకుంటోంది.

ఇదిలా ఉండగా, ఇటీవల అభిమానులతో నిర్వహించిన ఇంటరాక్షన్‌లో సమంత ‘మా ఇంటి బంగారం’ సినిమాపై తనకు ఎందుకు ప్రత్యేకమైన అనుబంధం ఏర్పడిందో వెల్లడించింది. ఈ సినిమాలో స్వర్ణ అనే పాత్రలో కనిపించిన ఆమె, ఆ పాత్రలోని పట్టుదల, జీవితాన్ని ఎదుర్కొనే ధైర్యం తనను బాగా ఆకట్టుకున్నాయని తెలిపింది. అంతేకాదు, ఇప్పటివరకు తాను చేసిన తెలుగు పాత్రల్లో నిజ జీవితంలోని సమంతకు అత్యంత దగ్గరగా ఉండేది స్వర్ణ పాత్రేనని వెల్లడించింది.

సినిమాలోని యాక్షన్ సన్నివేశాల గురించి మీడియా సమావేశంలో మాట్లాడిన సమంత, అవి పూర్తిగా సహజంగా తెరకెక్కించబడినవేనని చెప్పింది. “ఈ సినిమాలో ఎలాంటి స్లోమోషన్ షాట్లు, బిల్డప్ సీన్లు లేవు. ప్రతి ఫైట్ చాలా సహజంగా ఉంటుంది. నిజంగానే దెబ్బలు తగిలాయి, గాయాలు అయ్యాయి. రక్తం కూడా వచ్చింది. అయినప్పటికీ అన్ని యాక్షన్ సన్నివేశాలను నేనే చేశాను. అందుకే అవి ప్రేక్షకులకు అంత నిజమైన అనుభూతిని ఇస్తున్నాయి” అని వివరించింది.

దర్శకురాలు బి.వి. నందిని రెడ్డి తెరకెక్కించిన ఈ చిత్రాన్ని సమంతతో పాటు రాజ్ నిడిమోరు, హిమాన్క్ రెడ్డి దువ్వూరు కలిసి ట్రాలాలా మూవింగ్ పిక్చర్స్ బ్యానర్‌పై నిర్మించారు. గుల్షన్ దేవయ్య, దిగంత్ మంచాలే, గౌతమి, శ్రీముఖి కీలక పాత్రల్లో నటించారు.

మహిళా ప్రధాన కథాంశంతో తెరకెక్కిన ‘మా ఇంటి బంగారం’కు ప్రేక్షకుల నుంచి మంచి స్పందన లభిస్తుండగా, ఇప్పుడు రామ్ చరణ్ చేసిన ప్రత్యేక ప్రశంసలు ఈ సినిమాకు మరింత బలాన్ని చేకూర్చాయి. సోషల్ మీడియాలో అభిమానులు కూడా ఈ ట్వీట్‌ను షేర్ చేస్తూ సమంతకు అభినందనలు తెలుపుతున్నారు.