ఈ చిత్ర అద్భుత విజయంతో పాటు బాలీవుడ్ ప్రముఖ దర్శకుడు, సమంతతో సుదీర్ఘ అనుబంధం ఉన్న రాజ్ నిడిమోరు (రాజ్ & డీకే ద్వయం) ఇటీవల ఇచ్చిన ఒక ఇంటర్వ్యూలో ఆసక్తికర వ్యాఖ్యలు చేశారు. ఇండస్ట్రీలో సమంత స్టార్ పవర్, మహిళా ప్రాధాన్యత చిత్రాలపై ఉన్న ముందస్తు అంచనాలను కొందరు ఎలా తక్కువగా చూశారో ఆయన వివరించారు.

సమంత సత్తాను తక్కువగా అంచనా వేశారు: సినిమా విడుదలకు ముందు ఎదురైన ఒక చేదు అనుభవాన్ని రాజ్ ఈ సందర్భంగా పంచుకున్నారు. ‘‘మా ఇంటి బంగారం’ రిలీజ్ కావడానికి కొన్ని రోజుల ముందు మా చిత్రబృందం ఇండస్ట్రీకి చెందిన ఒక ప్రముఖ వ్యక్తిని కలిసింది. సినిమాపై పబ్లిక్ టాక్ ఎలా ఉందో తెలుసుకోవాలని ప్రయత్నించాం. కానీ ఆయన చెప్పిన సమాధానం మమ్మల్ని తీవ్ర ఆశ్చర్యానికి గురిచేసింది. ‘ప్రస్తుతానికి ఎవరూ ఈ సినిమా గురించి మాట్లాడుకోవడం లేదు. అయినా.. సాధారణంగా మహిళా ప్రాధాన్యత చిత్రాలపై పెద్దగా అంచనాలు ఉండవు. థియేటర్‌లోకి వచ్చాక బాగుంటే చూస్తారు.. లేదంటే లేదు’ అని ఆయన ముఖం మీదే చెప్పారు” అని రాజ్ పేర్కొన్నారు.

ఆ సమయంలో ఆ మాటలు ఎంతో కఠినంగా అనిపించినప్పటికీ, వ్యాపార కోణంలో నిజమేనేమో అని చిత్రబృందం భావించిందని రాజ్ అన్నారు. కానీ, మొదటి రోజు కలెక్షన్స్ చూశాక ఇండస్ట్రీ లెక్కలన్నీ మారిపోయాయని ఆయన స్పష్టం చేశారు. “మొదటి రోజు వసూళ్లు వచ్చాక మాకు ఒక విషయం స్పష్టంగా అర్థమైంది. కేవలం తన పేరుతోనే థియేటర్లకు జనాలను భారీగా తీసుకువచ్చే అద్భుతమైన కెపాసిటీ సమంతకు ఉంది. ఈ ఓపెనింగ్స్ ఇండస్ట్రీకి ఆ విషయాన్ని మరోసారి గట్టిగా గుర్తుచేశాయి” అన్నారు.