ఇప్పటివరకు మూడు డబుల్ సెంచరీలతో అగ్రస్థానంలో ఉన్న రోహిత్ శర్మ తర్వాత, కెరీర్‌లో రెండు ద్విశతకాలు బాదిన రెండో భారత ఆటగాడిగా నిలిచాడు. గతంలో 2023లో న్యూజిలాండ్‌పై హైదరాబాద్‌లో 208 పరుగులు చేసిన గిల్, ఇప్పుడు మరోసారి పరుగుల సునామీ సృష్టించాడు.

లక్ష్య ఛేదనలో ఓపెనర్లు రోహిత్ శర్మ, శుభ్‌మన్ గిల్ తొలి వికెట్‌‌కు ఏకంగా 255 పరుగుల భారీ భాగస్వామ్యాన్ని నమోదు చేశారు. రోహిత్ 75 బంతుల్లోనే 101 పరుగులు చేసి సెంచరీతో అండగా నిలిచాడు. రోహిత్ అవుటైనా గిల్ తన దూకుడు ఏమాత్రం తగ్గించలేదు. ఫోర్లు, సిక్సర్లతో మైదానం నలువైపులా బౌండరీల వర్షం కురిపిస్తూ మైదానాన్ని హోరెత్తించాడు.

ఈ మెరుపు ఇన్నింగ్స్ సమయంలో గిల్ పలు అరుదైన రికార్డులను కూడా తన ఖాతాలో వేసుకున్నాడు. అంతర్జాతీయ వన్డేల్లో అత్యంత వేగంగా 3,500 పరుగులు పూర్తి చేసిన ప్రపంచ రికార్డును సొంతం చేసుకున్నాడు. దక్షిణాఫ్రికా మాజీ దిగ్గజం హషీమ్ ఆమ్లా పేరిట ఉన్న రికార్డును కేవలం 68 ఇన్నింగ్స్‌లలోనే అధిగమించి అగ్రస్థానానికి చేరుకున్నాడు.

అంతేకాకుండా వన్డే క్రికెట్ ఛేజింగ్‌లో డబుల్ సెంచరీ సాధించిన తొలి భారత బ్యాటర్‌గా గిల్ మరో అరుదైన మైలురాయిని అందుకున్నాడు. అంతర్జాతీయ స్థాయిలో చూస్తే గ్లెన్ మ్యాక్స్‌వెల్ తర్వాత రన్ ఛేజ్‌లో ద్విశతకం బాదిన రెండో ప్రపంచ క్రికెటర్‌గా నిలిచాడు. కెప్టెన్ ఆడిన ఈ అద్భుతమైన ఇన్నింగ్స్‌తో భారీ మ్యాచ్‌లో భారత జట్టు విజయతీరాలకు చేరువైంది.