తాజాగా జరిగిన ఒక ఈవెంట్‌లో పాల్గొన్న సందీప్ రెడ్డి వంగా ‘స్పిరిట్’ సినిమాకు సంబంధించి ఇంట్రెస్టింగ్ అప్‌డేట్ ఇచ్చారు. సినిమా షూటింగ్ డిలే అవుతోందన్న వార్తలను ఆయన పూర్తిగా ఖండించారు. తాము ముందుగా ప్లాన్ చేసుకున్న షెడ్యూల్ ప్రకారమే సినిమా శరవేగంగా ముస్తాబవుతోందని స్పష్టం చేశారు. అంతేకాదు, ఇప్పటికే ఈ సినిమా షూటింగ్ 40 శాతం పూర్తయిందని చెప్పి ప్రభాస్ ఫ్యాన్స్‌ను ఆనందంలో ముంచెత్తారు. మిగిలిన 60 శాతం బ్యాలెన్స్ షూటింగ్‌ను కూడా ఎక్కడా బ్రేక్ లేకుండా, పక్కా ప్రణాళికతో కంప్లీట్ చేసేందుకు మూవీ టీమ్ సిద్ధంగా ఉందని ఆయన వివరించారు.

షూటింగ్ డిలే లేకపోవడంతో, గతంలో మేకర్స్ అధికారికంగా ప్రకటించినట్లుగానే 2027 మార్చి 5వ తేదీన ‘స్పిరిట్’ ప్రపంచవ్యాప్తంగా అత్యంత భారీ స్థాయిలో విడుదల కాబోతోందని సందీప్ క్లారిటీ ఇచ్చారు. “స్పిరిట్ సినిమా మీ అందరికీ కచ్చితంగా నచ్చుతుంది” అని ఆయన అత్యంత కాన్ఫిడెంట్‌గా చెప్పడంతో అభిమానుల్లో పూనకాలు మొదలయ్యాయి.

ప్రభాస్ క్రేజ్‌ను దృష్టిలో ఉంచుకుని ఈ చిత్రాన్ని పాన్ ఇండియా స్థాయిలోనే కాకుండా, పాన్ వరల్డ్ స్థాయిలో పలు భాషల్లో విడుదల చేసేందుకు సన్నాహాలు చేస్తున్నారు. ఈ సినిమాలో ‘యానిమల్’ బ్యూటీ త్రిప్తి దిమ్రి (Triptii Dimri) హీరోయిన్‌గా నటిస్తుండగా, బాలీవుడ్ ప్రముఖ నటుడు వివేక్ ఒబెరాయ్ (Vivek Oberoi) ఒక పవర్‌ఫుల్ విలన్ పాత్రలో ప్రభాస్‌ను ఢీకొట్టనున్నారు. ‘సలార్’, ‘కల్కి 2898 ఏడీ’ వంటి భారీ విజయాలతో ఫుల్ ఫామ్‌లో ఉన్న ప్రభాస్, తన తదుపరి చిత్రాలు ‘ది రాజా సాబ్’, ‘ఫౌజీ’ షూటింగ్స్‌లో బిజీగా ఉంటూనే, ఈ ‘స్పిరిట్’ క్యారెక్టర్‌కు ప్రాణం పోస్తున్నారు.