వన్డేలతో పాటు టెస్టు జట్టులోనూ రెగ్యులర్ సభ్యులుగా ఉన్న కెప్టెన్ శుభ్‌మన్ గిల్, జస్‌ప్రీత్ బుమ్రా, కేఎల్ రాహుల్, నితీష్ కుమార్ రెడ్డి, ప్రసిద్ధ్ కృష్ణ, కుల్దీప్ యాదవ్, మహ్మద్ సిరాజ్ తదితరులు చివరి రెండు వన్డేలు ఆడరని నివేదికలు స్పష్టం చేస్తున్నాయి. వీరంతా వన్డే సిరీస్ మధ్యలోనే వీడి, తొలి టెస్టు జరిగే వెల్లింగ్టన్‌కు ముందుగానే పయనమవుతారు. గిల్ గైర్హాజరీలో వైస్ కెప్టెన్ శ్రేయస్ అయ్యర్ ఆఖరి రెండు వన్డేలకు భారత జట్టు పగ్గాలు చేపట్టే అవకాశం ఉంది. టెస్టు క్రికెట్‌కు అత్యంత ప్రాధాన్యత ఇవ్వాలనే ఉద్దేశంతోనే గిల్ ఈ కఠిన నిర్ణయం తీసుకున్నట్లు తెలుస్తోంది.

ఆటగాళ్లతో పాటు కోచింగ్ సిబ్బంది కూడా ఈ సిరీస్ కోసం రెండు బృందాలుగా విడిపోనుంది. హెడ్ కోచ్ గౌతమ్ గంభీర్, బౌలింగ్ కోచ్ మోర్నీ మోర్కెల్, అసిస్టెంట్ కోచ్ సితాంషు కోటక్, ఫీల్డింగ్ కోచ్ శుభదీప్ ఘోష్‌లలో ఇద్దరు వన్డే జట్టుతో ఉండనుండగా, మిగిలిన ఇద్దరు టెస్టు జట్టుతో ముందుగానే వెల్లింగ్టన్ చేరుకుంటారు. వన్డేల తర్వాత టీ20 సిరీస్ పెట్టి ఉంటే అసలు ఈ సమస్య వచ్చేది కాదని క్రీడా పండితులు అభిప్రాయపడుతున్నారు. టీ20 జట్టు, టెస్టు జట్టులో దాదాపు వేర్వేరు ఆటగాళ్లు ఉంటారు కాబట్టి ఎలాంటి ఇబ్బంది ఉండేది కాదని చెబుతున్నారు. షెడ్యూల్ రూపొందించే సమయంలో కనీస ఆలోచన చేయలేదని విమర్శలు వినిపిస్తున్నాయి.

India’s tour of New Zealand: Full schedule