నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో వచ్చిన ‘దసరా’ ఎంతటి ఇంపాక్ట్ చూపించిందో ప్రత్యేకంగా చెప్పాల్సిన అవసరం లేదు. అప్పటివరకు ఎక్కువగా క్లాస్, ఫ్యామిలీ, నేచురల్ క్యారెక్టర్లతో కనిపించిన నాని.. ఒక్కసారిగా రా అండ్ రస్టిక్ లుక్‌లో కనిపించి ప్రేక్షకులను షాక్ ఇచ్చాడు. సింగరేణి బొగ్గు గనుల నేపథ్యంలో తెరకెక్కిన ‘దసరా’ నాని కెరీర్‌లోనే ఒక కొత్త అధ్యాయాన్ని మొదలుపెట్టింది. అలాంటి కాంబినేషన్ మళ్లీ కలుస్తోంది అంటే సహజంగానే అంచనాలు పెరుగుతాయి. కానీ ‘ది ప్యారడైజ్’ విషయంలో అంచనాలు కేవలం కాంబినేషన్ వల్ల మాత్రమే పెరగలేదు. ఈ సినిమా చుట్టూ మొదటి నుంచి ఒక మిస్టరీ ఉంది. నాని జడలు ఎందుకు పెంచుకున్నాడు? అసలు జడల్ జమానా ఎవరు? ఈ కథలో మోహన్ బాబు పాత్ర ఏంటి? రాఘవ్ జుయల్, సంపుర్ణేష్ బాబు క్యారెక్టర్‌లు ఏంటీ? అసలు ది ప్యారడైజ్ సినిమా కథేంటి? అనే ప్రశ్నలు సినిమాపై ఆసక్తిని మరింత పెంచాయి.

‘ది ప్యారడైజ్’ కథ ఎక్కడ మొదలైందో తెలుసుకోవాలంటే.. ముందుగా ‘దసరా’ రోజుల్లోకి వెళ్లాలి. ‘దసరా’ రిలీజై యునానిమస్‌గా బ్లాక్ బస్టర్ తెచ్చుకున్న తర్వాత నాని, శ్రీకాంత్ ఓదెల కాంబినేషన్‌పై అందరి దృష్టి పడింది. ఆ తర్వాత వీరిద్దరూ మరోసారి కలిసి సినిమా చేస్తారనే వార్త బయటకు వచ్చినప్పటి నుంచే అభిమానుల్లో ఆసక్తి మొదలైంది.

2024 నవంబర్ 6న ఈ సినిమాకు ‘ది ప్యారడైజ్’ అనే టైటిల్‌ను అధికారికంగా ప్రకటించారు. అప్పటినుంచి ఈ పేరు కూడా సినిమాపై ఆసక్తిని పెంచింది. ఎందుకంటే ‘ప్యారడైజ్’ అంటే స్వర్గం. కానీ సినిమా పోస్టర్లు, గ్లింప్స్‌లో కనిపిస్తున్న ప్రపంచం మాత్రం అందుకు పూర్తి విరుద్ధంగా కనిపిస్తోంది. అక్కడ పేదరికం ఉంది.. హింస, అణచివేతతో పాటు తిరుగుబాటు ఉంది. మరి ఇలాంటి ప్రపంచానికి ‘ప్యారడైజ్’ అనే పేరు ఎందుకు పెట్టారు? సినిమా చూసిన తర్వాతే ఆ ప్రశ్నకు అసలు సమాధానం దొరికే అవకాశం ఉంది.

2025 జూన్ 21న ‘ది ప్యారడైజ్’ షూటింగ్ అధికారికంగా ప్రారంభమైంది. సినిమా కోసం భారీ సెట్స్ నిర్మించారు. లైవ్ లొకేషన్స్‌లో షూటింగ్ చేయడం కంటే 1980ల కాలాన్ని తమకు కావాల్సిన విధంగా సృష్టించుకునేందుకు సెట్స్‌నే ప్రధానంగా ఉపయోగించారు.

కథ 1980ల నాటి సికింద్రాబాద్ నేపథ్యంలో సాగుతుంది. అక్కడ అణచివేతకు గురైన ఒక వర్గం ఉంటుంది. గ్లింప్స్‌లో ఈ ప్రజలను కాకులతో పోలుస్తూ ఒక ప్రతీకాత్మక ప్రపంచాన్ని చూపించారు. చరిత్రలో చిలుకల గురించి రాశారు.. పావురాల గురించి రాశారు.. కానీ కాకుల గురించి ఎవరూ రాయలేదనే భావనతో ఈ ప్రపంచాన్ని పరిచయం చేశారు. ఈ ఒక్క ఆలోచనతోనే దర్శకుడు ఏం చెప్పబోతున్నాడనే దానిపై ఒక ఆసక్తికరమైన ప్రశ్న మొదలవుతుంది.

ఎవరూ రాయని కథను ఎవరు రాయబోతున్నారు? గుర్తింపు లేని మనిషి తన ఉనికిని ఎలా నిరూపించుకుంటాడు? ఒక సమాజానికి గౌరవం కావాలంటే ఎంత దూరం వెళ్లాలి? ఈ ప్రశ్నల మధ్యే జడల్ జమానా పాత్ర పుడుతుంది.

ఏ ప్రభుత్వాలూ వీరిని గుర్తించలేదు. చాలా ఏళ్లు దొంగతనాలు చేసుకుంటూనే బతికిన వీరికి ఎన్టీఆర్ ప్రభుత్వ హయాంలో కాస్త గుర్తింపు వచ్చింది. రేషన్ కార్డులివ్వడంతో పాటు బీసీలుగా గుర్తించే ప్రయత్నం జరిగింది. ఆ టైంలోనే దొంగతనాల నుంచి నాటు సారా వైపు ఈ సంచార జాతి మళ్లింది. కానీ ఇక్కడే ప్రభుత్వ సారా దుకాణాలను నడిపించే రాజకీయ నాయకులతో వీరికి ఘర్షణ మొదలవడం.. వీరిపై అఘాయిత్యాలు జరగడంతో తిరుగుబాటు మొదలైంది.

ఈ సంచార జాతిని నడిపించే నాయకుడి కథే ‘ది ప్యారడైజ్’లో చూడబోతున్నాం. ఒక రకంగా చెప్పాలంటే ‘పుష్ప’, ‘పెద్ది’ సినిమాలను మిక్స్ చేసినట్లుగా ఈ కథ ఉండబోతున్నట్లు తెలుస్తోంది. ‘పుష్ప’లో హీరో ఇంటిపేరు కోసం పోరాడతాడు. ‘పెద్ది’లో కథానాయకుడు తన ఊరికి గుర్తింపు కోసం తపిస్తాడు. కానీ ‘ది ప్యారడైజ్’లో మాత్రం కథానాయకుడి పోరాటం తనకోసం మాత్రమే కాకుండా.. తన జాతి మొత్తానికి గుర్తింపు తీసుకురావడం కోసం ఉంటుందని సమాచారం. నిజానికి ఇదే కథతో సినిమా వస్తే మాత్రం రికార్డులు తిరగరాయడం పక్కా.

నాని స్వయంగా ఈ సినిమా తల్లి-కొడుకు కథ అని చెప్పాడు. దర్శకుడు కూడా సినిమాలో యాక్షన్ కంటే ఎమోషన్ బలంగా ఉంటుందని వివరించాడు. అంటే జడల్ జమానా చేసే పోరాటానికి ఒక వ్యక్తిగత నేపథ్యం ఉంటుంది. అతని జీవితాన్ని ప్రభావితం చేసిన ఒక తల్లి ఉంటుంది. ఆ బంధం అతని నిర్ణయాలను, అతని ఆలోచనలను, చివరికి అతని తిరుగుబాటును ప్రభావితం చేసే అవకాశం ఉంది.

ఇక కయాదు లోహర్ సుబ్బు పాత్రలో కనిపించనుంది. సంపూర్ణేష్ బాబు బిర్యాని అనే పాత్రలో నటించాడు. ఇప్పటివరకు ఎక్కువగా కామెడీ పాత్రల్లో కనిపించిన సంపూర్ణేష్‌కు ఇది పూర్తిగా భిన్నమైన ప్రయత్నం. ది ప్యారడైజ్ ప్రపంచంలో బిర్యాని పాత్రకు కూడా కీలక స్థానం ఉన్నట్లు తెలుస్తుంది.

అయితే ఈ నిర్ణయం వల్ల మరో విషయం జరిగింది. సినిమా కథపై ప్రేక్షకుల్లో ఉన్న క్యూరియాసిటీ మరింత పెరిగింది. ఎందుకంటే ట్రైలర్ ఉంటే కథలోని చాలా విషయాలు ముందే తెలిసిపోయేవి. ఇప్పుడు మాత్రం గ్లింప్స్, పాటలు, పోస్టర్లతో వచ్చిన ముక్కలను కలుపుకుంటూ ప్రేక్షకులు తమకంటూ ఒక కథను ఊహించుకోవాల్సి వస్తోంది. అసలు సినిమా ఎలా ఉంటుందో తెలుసుకోవాలంటే నేరుగా థియేటర్‌లోకి వెళ్లాల్సిందే.

ఇప్పటివరకు మనం చూసింది ‘ది ప్యారడైజ్’ అనే ప్రపంచానికి సంబంధించిన కొన్ని ముక్కలు మాత్రమే. కానీ ఆ ముక్కలన్నింటినీ కలిపితే అసలు బొమ్మ ఇంకా పూర్తిగా కనిపించలేదు. జడల్ జమానా ఎందుకు తిరుగుబాటు చేస్తాడు? అతని తల్లి కథలో ఎంత కీలకం? శికంజా మాలిక్‌తో అతని సంబంధం ఏంటి? విక్రమ్ మాలిక్ పాత్ర అసలు లక్ష్యం ఏంటి? సుబ్బు పాత్ర జడల్ జీవితాన్ని ఎలా ప్రభావితం చేస్తుంది? బిర్యాని పాత్ర ఎలాంటి మలుపు తీసుకొస్తుంది? ‘కాకులు’ అనే ప్రతీక వెనుక అసలు అర్థం ఏంటి? ‘ప్యారడైజ్’ అనే పేరుకు కథలో ఉన్న సంబంధం ఏంటి? అన్నింటికంటే ముఖ్యంగా.. జడల్ జమానా పోరాటం చివరికి ఎక్కడ ముగుస్తుంది? ఈ ప్రశ్నలకు సమాధానం దొరకాలంటే ఇంకొన్ని గంటలు వేయిట్ చేయాల్సిందే.. అప్పటివరకు మనం చూసేది జడల్ జమానా నీడ మాత్రమే.