శ్రీవారి దర్శనానికి వచ్చే భక్తులు తమ వెంటే తీసుకొచ్చే చిన్నపిల్లలు, వృద్ధుల గురించి ప్రత్యేక శ్రద్ధ వహించాలని తిరుమల పోలీసులు కోరారు. రద్దీ ప్రాంతాల్లో పిల్లలను లేదా వృద్ధులను ఒంటరిగా వదిలి వెళ్లకూడదని, వారి జేబులో పేరు, చిరునామా, ఫోన్ నంబర్ వంటి వివరాలు రాసిన చీటీ ఉంచితే అత్యవసర సమయాల్లో ఎంతో ఉపయోగపడుతుందని సూచించారు తిరుపతి జిల్లా ఎస్పీ శ్రీ ఎల్. సుబ్బరాయుడు, టీటీడీ చీఫ్ విజిలెన్స్ అండ్ సెక్యూరిటీ అధికారి మురళీకృష్ణ. ఈసందర్భంగా భక్తులకు పలు సూచనలు చేశారు.తిరుమలలో చిన్నపిల్లలు, వృద్ధులు తప్పిపోయిన ఘటనల్లో పోలీసులు, విజిలెన్స్, కమాండ్ కంట్రోల్ విభాగాలు సమన్వయంతో వెంటనే స్పందించి కుటుంబ సభ్యులకు అప్పగించే విధంగా నిరంతరం పనిచేస్తున్నాయని అధికారులు తెలిపారు. ప్రతిరోజూ సగటున ఆరుగురు నుంచి ఏడుగురు వరకు తప్పిపోయిన వారిని గుర్తించి వారి బంధువులకు అప్పగిస్తున్నామని వెల్లడించారు.

భక్తుల భద్రతను అత్యంత ప్రాధాన్యంగా తీసుకొని తిరుమలలో ప్రతిరోజూ పోలీసులు, విజిలెన్స్ ఇతర శాఖల సమన్వయంతో ఏరియా డామినేషన్ నిర్వహిస్తున్నట్లు అధికారులు తెలిపారు. ముఖ్యంగా రాత్రి సమయాల్లో గుర్తించిన ప్రాంతాల్లో ప్రత్యేక నిఘా ఏర్పాటు చేసి ఎటువంటి అవాంఛనీయ సంఘటనలు జరగకుండా కట్టుదిట్టమైన చర్యలు చేపడుతున్నామని పేర్కొన్నారు. ఈ చర్యల వలన శ్రీవారి దర్శనార్థం తిరుమలకు వచ్చే భక్తుల్లో మరింత భద్రతాభావం పెరిగి, వారు ప్రశాంతంగా దర్శనం పూర్తి చేసుకొని సంతృప్తికరంగా తమ గమ్యస్థానాలకు చేరుకుంటున్నారని అధికారులు తెలిపారు.