“తిరుపతి హైవేలో మా దగ్గర ప్లాట్లు కొనుగోలు చేస్తే చాలు.. జీవితాంతం శ్రీవారి వీఐపీ బ్రేక్ దర్శనం కల్పిస్తాం” అంటూ ‘ఎస్సీపీ డెవలపర్స్’ (SCP Developers) అనే రియల్ ఎస్టేట్ సంస్థ కొన్ని రీల్స్, ప్రకటనల రూపంలో విస్తృతంగా ప్రచారం చేసింది. సోషల్ మీడియా వేదికగా సాగిన ఈ తప్పుడు ప్రచారం భక్తుల్లో తీవ్ర కలకలం రేపింది. ఈ వార్తలు అధికారుల దృష్టికి వెళ్లడంతో వారు వెంటనే అప్రమత్తమయ్యారు. ఆ సంస్థ ఇస్తున్న ఆఫర్‌తో టీటీడీకి ఎలాంటి సంబంధం లేదని తేల్చి చెప్పారు. ఆ సంస్థ చేస్తున్న ప్రచారం పూర్తిగా అసత్యమని, ఇది కేవలం వ్యాపారాభివృద్ధి కోసం భక్తులను తప్పుదోవ పట్టించే కుట్రలో భాగమేనని అధికారులు స్పష్టం చేశారు.

దేవుడి పేరు మీద భక్తుల విశ్వాసాన్ని దుర్వినియోగం చేస్తూ కోట్ల రూపాయల వ్యాపార లాభాలు పొందాలని చూస్తే ఏమాత్రం సహించే ప్రసక్తే లేదని అధికారులు గట్టిగా హెచ్చరించారు. ఈ వ్యవహారంలో ఆ ఎస్సీపీ డెవలపర్స్ సంస్థపై క్రిమినల్ కేసులు నమోదు చేసి కఠిన చర్యలు తీసుకునేలా పోలీసులకు అధికారికంగా ఫిర్యాదు చేస్తున్నట్లు వెల్లడించారు. భవిష్యత్తులో కూడా ఎవరైనా సరే టీటీడీ పేరుతో తప్పుడు హామీలు ఇస్తూ డబ్బులు వసూలు చేయాలని చూస్తే చట్టపరంగా కఠినమైన శిక్షలు తప్పవని తేల్చి చెప్పారు. భక్తులకు దర్శనాల విషయంలో ఏ చిన్న సందేహం వచ్చినా వెంటనే నేరుగా అధికారిక వేదికల ద్వారా నిజానిజాలు నిర్ధారించుకోవాలని టీటీడీ మరోసారి కోరింది.