తిరుమల ఆలయ సంప్రదాయం ప్రకారం, దర్శనం అనంతరం వీరందరికీ రంగనాయకుల మండపంలో వేద పండితులు ఆశీర్వచనం అందించారు. ఆలయ అధికారులు వారికి శ్రీవారి తీర్థప్రసాదాలను అందజేసి, పట్టువస్త్రంతో ఘనంగా సత్కరించారు. స్వామివారి కృప అందరిపై ఉండాలని అధికారులు ఆకాంక్షించారు.

దర్శనానంతరం ఆలయం వెలుపల సముద్రఖని మీడియాతో ముచ్చటించారు. ఈ సందర్భంగా ఆయన తమిళ రాజకీయ పరిణామాలపై స్పందిస్తూ, తన ఆత్మీయ మిత్రుడు, దళపతి విజయ్ తమిళనాడు ముఖ్యమంత్రి బాధ్యతలు చేపట్టడంపై తన అమితానందాన్ని వ్యక్తం చేశారు.

సముద్రఖని మాట్లాడుతూ.. “విజయ్ ఒక గొప్ప నాయకుడిగా ఎదగాలని నేను ఎప్పటి నుంచో కోరుకుంటున్నాను. ఈ రోజు కోసమే నేను ఎన్నాళ్లుగానో ఎదురుచూశాను. ఆయన రాజకీయ ప్రస్థానంలో ఎదురయ్యే అన్ని సవాళ్లను ధైర్యంగా ఎదుర్కోవాలని, ప్రజలందరికీ మంచి చేసే స్థాయికి చేరుకోవాలని మనస్ఫూర్తిగా ఆకాంక్షిస్తున్నాను” అని తెలిపారు. విజయ్ కి తన హృదయపూర్వక శుభాకాంక్షలు తెలియజేస్తూ, ఆయన విజయం పట్ల తనకున్న అభిమానాన్ని చాటుకున్నారు.

తన సినీ కెరీర్ గురించి సముద్రఖని పలు ఆసక్తికర విషయాలను పంచుకున్నారు. ప్రస్తుతం తాను అటు నటుడిగా, ఇటు దర్శకుడిగా ఎంతో బిజీగా ఉన్నానని తెలిపారు. నందమూరి బాలకృష్ణ నటిస్తున్న తాజా చిత్రంలో తాను కీలక పాత్ర పోషిస్తున్నానని, బాలయ్యతో పని చేయడం ఎంతో ఆనందంగా ఉందని చెప్పారు.

గోపీచంద్ మలినేని దర్శకత్వంలో వస్తున్న ఒక భారీ ప్రాజెక్టులో భాగస్వామిని అవుతున్నానని, అలాగే దేశవ్యాప్తంగా ఎంతో ఆసక్తిగా ఎదురుచూస్తున్న ‘జై హనుమాన్’ చిత్రంలోనూ నటిస్తున్నట్లు ధృవీకరించారు. ఆయన రూపొందించిన ‘స్కూల్ బస్’ చిత్రం మూడు భాషల్లో విడుదలకు సిద్ధంగా ఉందని, ఈ విభిన్నమైన కథాంశాన్ని ప్రేక్షకులు ఆదరించాలని కోరారు. వీటితో పాటు తమిళంలో మరో రెండు మూడు సినిమాలు నిర్మాణ దశలో ఉన్నాయని ఆయన వెల్లడించారు.