ఈ చిత్రానికి మణి తెల్లగూటి కథ అందిస్తూ దర్శకత్వ బాధ్యతలు నిర్వహించారు. సనాతన ధర్మంలోని కొన్ని ఆధ్యాత్మిక రహస్యాల ఆధారంగా ఈ మైథలాజికల్ ఫిక్షనల్ థ్రిల్లర్‌ను ఆయన చూపించబోతున్నారు. ప్రపంచాన్ని చీకటి కమ్మేస్తున్న తరుణంలో, వెలుగుగా అవతరించే ఒక దైవిక శక్తి చుట్టూ ఈ కథ తిరుగుతుందని దర్శకుడు స్పష్టం చేశారు. కేవలం భక్తి కోణంలోనే కాకుండా, నేటి తరం ప్రేక్షకులను ఆకట్టుకునేలా ఉత్కంఠభరితమైన థ్రిల్లింగ్ ఎలిమెంట్స్ ఇందులో జోడించారు. సంస్కృతి, ఆధ్యాత్మికత, సస్పెన్స్ కలయికతో సాగే ఈ కథ ప్రతి వర్గం ప్రేక్షకులకు ఒక సరికొత్త అనుభూతిని ఇస్తుందని నిర్మాతలు రాధిక, శ్రీనివాస్ ఎంతో నమ్మకంగా చెబుతున్నారు.

ఇటీవల రిలీజైన ‘త్రికాల’ చిత్ర ట్రైలర్ సామాజిక మాధ్యమాలలో విశేషమైన స్పందన సొంతం చేసుకుంది. ఈ ట్రైలర్‌లో చూపించిన కొన్ని యాక్షన్ సీన్లు, విజువల్స్ ప్రేక్షకులను ఎంతగానో ఆకట్టుకున్నాయి. ముఖ్యంగా మాస్టర్ మహేంద్రన్ చేసిన సాహసోపేతమైన యాక్షన్ సీక్వెన్సులు సినిమాకు ప్రత్యేక ఆకర్షణగా నిలవబోతున్నాయి. వైవిధ్యమైన నటనతో మెప్పించే అజయ్ ఇందులో ఒక పవర్‌ఫుల్ పాత్రలో కనిపిస్తూ ఉత్కంఠను రేకెత్తిస్తున్నారు. సీనియర్ నటి ఆమని సైతం ఒక కీలకమైన, ప్రాధాన్యత ఉన్న పాత్రను పోషించారు. సాహితి అవంచ, ప్రభాకర్, అంబటి అర్జున్, రౌడీ రోహిణి లాంటి నటీనటులు తమ అద్భుతమైన నటనతో ఈ చిత్రానికి మరింత బలాన్ని చేకూర్చారు. ప్రతి ఒక్క పాత్రను కథకు అనుగుణంగా చాలా చక్కగా తీర్చిదిద్దినట్లు ట్రైలర్ చూస్తే స్పష్టంగా అర్థమవుతోంది.

ఈ సినిమాకు విజువల్స్, గ్రాఫిక్స్ ప్రధాన ఆకర్షణగా నిలవనున్నాయి. ఆధునిక సాంకేతికతను ఉపయోగించి రూపొందించిన హై క్వాలిటీ వీఎఫ్ఎక్స్ (VFX) ప్రేక్షకులకు వెండితెరపై ఒక అద్భుతమైన విజువల్ ఎక్స్‌పీరియన్స్‌ను అందిస్తుందని చిత్రబృందం గర్వంగా చెప్తోంది. దీనికి తోడు అర్జున్ రెడ్డి, అనిమల్, స్పిరిట్ వంటి భారీ చిత్రాలకు అద్భుతమైన సంగీతాన్ని అందించిన హర్షవర్ధన్ రామేశ్వర్ ఈ సినిమాకు పాటలు సమకూర్చారు. ఆయన అందించిన మ్యూజిక్ సినిమా స్థాయిని మరో మెట్టు ఎక్కించింది. అలాగే షాజిత్ హుమాయున్ అందించిన నేపథ్య సంగీతం థియేటర్లలో ప్రేక్షకులను కథలో లీనమయ్యేలా చేస్తుంది. పవన్ చెన్న అందించిన ఛాయాగ్రహణం విజువల్స్‌ను మరింత గ్రాండ్‌గా చూపించనుంది.

టాలీవుడ్‌లో ‘సిద్ధు ఫ్రమ్ శ్రీకాకుళం’ సినిమాతో కథానాయికగా ప్రయాణం ప్రారంభించిన శ్రద్ధాదాస్, ఆ తర్వాత ‘ఆర్య 2’ చిత్రంతో పెద్ద గుర్తింపు తెచ్చుకున్నారు. ఆపై ‘గుంటూరు టాకీస్’, ‘ఏక్ మినీ కథ’, ‘డిక్టేటర్’, ‘నాగవల్లి’ లాంటి ఎన్నో సినిమాల్లో విభిన్నమైన పాత్రలతో మెప్పించారు. ఇప్పుడు ‘త్రికాల’ చిత్రంలో ఆమె సరికొత్త హావభావాలతో, వైవిధ్యమైన అవతారంలో కనిపించబోతున్నారు.

ప్రస్తుతం సనాతన ధర్మం, పురాణాల నేపథ్యంలో వస్తున్న సినిమాలకు దేశవ్యాప్తంగా బ్రహ్మాండమైన ఆదరణ లభిస్తోంది. ‘కార్తికేయ 2’, ‘హనుమాన్’ వంటి వంటి విజయాలే ఇందుకు నిదర్శనం. ఆ కోవలోనే నిర్మితమైన ‘త్రికాల’ చిత్రం కూడా విజువల్స్ పరంగా, కథ పరంగా ప్రేక్షకులను అలరిస్తుందని ట్రేడ్ వర్గాలు అంచనా వేస్తున్నాయి. మే 29 తేదీన థియేటర్లలో విడుదల కాబోతున్న ఈ మైథలాజికల్ థ్రిల్లర్ మూవీ బాక్సాఫీస్ వద్ద ఎలాంటి రికార్డులు సృష్టిస్తుందో చూడాలి. శ్రద్ధాదాస్ కెరీర్‌లో ఈ చిత్రం ఒక మైలురాయిగా నిలిచిపోతుందని ఆమె అభిమానులు ఆశిస్తున్నారు.