Last Updated:
Trump: వైట్హౌస్ వార్తా సేకరణ ప్రతినిధిగా ‘సీఎన్ఎన్’ (CNN)ను అనుమతించేందుకు నిరాకరించడంతో, అమెరికా అధ్యక్షుడు డొనాల్డ్ ట్రంప్నకు సంబంధించిన పూల్డ్ టీవీ కవరేజ్ను నిలిపివేయాలని ప్రముఖ యూఎస్ టెలివిజన్ నెట్వర్క్లు నిర్ణయించాయి.
ఈ మేరకు ‘ది న్యూయార్క్ టైమ్స్’ పత్రిక ఒక కథనాన్ని వెల్లడించింది. టెలివిజన్ పూల్ కన్సార్టియం తాత్కాలిక చైర్మన్, ‘ఫాక్స్ న్యూస్’ వాషింగ్టన్ బ్యూరో చీఫ్ బ్రియాన్ బౌటన్ ఈ నిర్ణయాన్ని పూల్ సభ్యులకు పంపిన అంతర్గత లేఖలో స్పష్టం చేశారు. సోమవారం నుంచి అధ్యక్షుడి కోసం కేటాయించిన అధికారిక పూల్ కార్యక్రమాలను టీవీ పూల్ కవర్ చేయదని, దీనికి ప్రత్యామ్నాయంగా ఎలాంటి పూల్ ఏర్పాటు చేయబోమని ఆయన తేల్చిచెప్పారు. అయితే మిగిలిన ఇతర సాధారణ పూల్ కవరేజ్లు యథావిధిగా కొనసాగుతాయని పేర్కొన్నారు. అమెరికాలో ప్రధాన టీవీ నెట్వర్క్లు రొటేషన్ పద్ధతిలో ప్రతి త్రైమాసికానికి ఒకసారి ఈ పూల్ కన్సార్టియం బాధ్యతలను నిర్వహిస్తుంటాయి.
ఐక్యరాజ్యసమితి సర్వసభ్య సమావేశానికి హాజరయ్యేందుకు సోమవారం బయలుదేరిన ట్రంప్ పర్యటనను కవర్ చేయాల్సిన వంతు ‘సీఎన్ఎన్’కు వచ్చింది. అయితే సీఎన్ఎన్ తన విధులను నిర్వహించకుండా వైట్హౌస్ అడ్డుకోవడంతో ఈ నిరసన నిర్ణయం తీసుకున్నారు. కాగా, ప్రింట్, రేడియో, వార్తా సంస్థలు (వైర్ జర్నలిస్టులు), ఫోటోగ్రాఫర్లు ఎప్పటిలాగే అధ్యక్షుడి కార్యక్రమాలను కవర్ చేస్తారని న్యూయార్క్ టైమ్స్ తెలిపింది.
ఈ పరిణామంపై ప్రముఖ వార్తా ఛానళ్లు ఏబీసీ (ABC), సీబీఎస్ (CBS), సీఎన్ఎన్ (CNN), ఫాక్స్ న్యూస్ (Fox News), ఎన్బీసీ (NBC) సంయుక్తంగా ఒక ప్రకటనను విడుదల చేశాయి. “వార్తా కథనాల ఆధారంగా మీడియా సంస్థలపై అభ్యంతరం వ్యక్తం చేస్తూ ఏ ప్రభుత్వమూ ఇలాంటి ఆంక్షలు విధించకూడదు” అని అందులో స్పష్టం చేశాయి. ఈ ఐదు నెట్వర్క్లు దీర్ఘకాలంగా రొటేషన్ పద్ధతిలో అధ్యక్షుడి కార్యక్రమాలను కవర్ చేస్తూ, ఖర్చులను పంచుకుంటూ ప్రపంచవ్యాప్త వార్తా సంస్థలకు ఆ దృశ్యాలను (ఫుటేజ్) అందిస్తున్నాయి.
ఉద్దేశపూర్వకంగా ప్రతికూల వార్తలు (నెగెటివ్ స్టోరీలు) రాస్తున్నారంటూ CNN, MS NOW, Politico జర్నలిస్టులపై ట్రంప్ నిషేధం విధించడంతో ఈ వివాదం మొదలైంది. శనివారం వైట్హౌస్ కాంప్లెక్స్కు చేరుకున్న ఈ మూడు సంస్థల ప్రతినిధుల ప్రెస్ గుర్తింపు కార్డులను (బ్యాడ్జీలను) అధికారులు స్వాధీనం చేసుకున్నారు.
దీనిపై సదరు మూడు వార్తా సంస్థలు న్యాయపోరాటానికి దిగాయి. ట్రంప్ ప్రభుత్వం తీసుకున్న ఈ చర్య తమ భావ ప్రకటనా స్వేచ్ఛను, పత్రికా స్వేచ్ఛను సూచించే ‘ఫస్ట్ అమెండ్మెంట్’ (First Amendment) రాజ్యాంగ హక్కులను ఉల్లంఘించడమేనని వాదిస్తూ ట్రంప్ యంత్రాంగంపై దావా వేయనున్నట్లు తెలిపాయి. కోర్టులో తుది తీర్పు వచ్చే వరకు ఈ నిషేధాన్ని తాత్కాలికంగా ఎత్తివేయాలని న్యాయమూర్తిని ఆశ్రయించాయి.
మరోవైపు అధ్యక్షుడు డొనాల్డ్ ట్రంప్ సోమవారం సోషల్ మీడియా వేదికగా స్పందిస్తూ.. తాను పత్రికా స్వేచ్ఛను గౌరవిస్తానని, ప్రభుత్వం పత్రికా స్వేచ్ఛపై ఎలాంటి దాడి చేయడం లేదని పేర్కొన్నారు. తాము చేస్తున్న పోరాటం కేవలం ‘ఫేక్ న్యూస్’ (నకిలీ వార్తల)పై మాత్రమేనని ఆయన సమర్థించుకున్నారు.
గతంలో 2009లో ఒబామా అధ్యక్షుడిగా ఉన్న సమయంలో, యుఎస్ ట్రెజరీ డిపార్ట్మెంట్ కార్యక్రమంలో ఫాక్స్ న్యూస్ను పాల్గొనకుండా అడ్డుకోవాలని ప్రయత్నించినప్పుడు కూడా ప్రధాన మీడియా నెట్వర్క్లు ఇలాగే ఐక్యంగా నిరసన తెలిపాయని, దాంతో అప్పటి ప్రభుత్వం వెనక్కి తగ్గిందని న్యూయార్క్ టైమ్స్ గుర్తుచేసింది.
