ఐరాస భద్రతా మండలి వార్షిక నివేదికపై చర్చ జరుగుతున్న సమయంలో పాకిస్తాన్ రాయబారి ఆసిమ్ ఇఫ్తికార్ అహ్మద్ కశ్మీర్ అంశాన్ని లేవనెత్తారు. ఐరాస తీర్మానాల ప్రకారమే ఈ వివాదాన్ని పరిష్కరించాలంటూ పాత రాగాన్ని అందుకున్నారు. దీనిపై భారత రాయబారి హరీష్ తీవ్రంగా స్పందిస్తూ.. “విభజన రాజకీయ ప్రయోజనాల కోసం ఐరాస వంటి ఉన్నతమైన వేదికలను దుర్వినియోగం చేసే తన వండ్ర బుద్ధిని పాకిస్తాన్ ఈ వేదికపై కూడా వదులుకోలేదు. ఐరాస భద్రతా మండలిలో సభ్యత్వాన్ని కలిగి ఉండటం అనేది ఒక పెద్ద బాధ్యత అని నేను పాకిస్తాన్‌కు గుర్తు చేయాలనుకుంటున్నాను. ఇది పక్షపాత, అబద్ధపు కథనాలను ప్రచారం చేసే వేదిక కాదు” అని హరీష్ హెచ్చరించారు. అంతేకాకుండా, భద్రతా మండలిలో ఉన్న సమయంలో పాకిస్తాన్ తప్పుడు మరియు తప్పుదోవ పట్టించే సమాచారాన్ని ప్రచారం చేసిందని భారత్ ఆరోపించింది.

జమ్మూ కశ్మీర్ హోదాపై భారతదేశానికి ఎటువంటి సందిగ్ధత లేదని హరీష్ స్పష్టం చేశారు. “జమ్మూ కశ్మీర్ ఎల్లప్పుడూ భారతదేశంలో అంతర్భాగం మరియు విడదీయరాని భాగం. దీనికి విరుద్ధంగా చేసే ఎలాంటి వాదనలైనా ఆధార రహితమైనవి మరియు చారిత్రక వాస్తవాలకు విరుద్ధమైనవి” అని ఆయన పునరుద్ఘాటించారు. పాకిస్తాన్ చేసే ఖాళీ నినాదాలు, అబద్ధపు వాదనలు గ్రౌండ్ రియాలిటీని (వాస్తవాన్ని) మార్చలేవని స్పష్టం చేశారు.

ఇదే సమయంలో ఐరాస భద్రతా మండలిలో తక్షణమే సంస్కరణలు చేపట్టాలని భారత్ మరోసారి డిమాండ్ చేసింది. ప్రస్తుతమున్న భద్రతా మండలి నిర్మాణం ప్రస్తుత ప్రపంచ వాస్తవాలను ప్రతిబింబించడం లేదని హరీష్ అభిప్రాయపడ్డారు. భద్రతా మండలి వార్షిక నివేదికను ఏడాదిలోగా ముందే సమర్పించాలని, ఈ వ్యవస్థను మరింత ప్రభావవంతంగా మార్చాల్సిన అవసరం ఉందని ఆయన నొక్కి చెప్పారు. “యథాతథ స్థితిని (Status quo) కొనసాగించడం వల్ల భద్రతా మండలి సమర్థవంతంగా పనిచేయలేదు, భవిష్యత్తులో కూడా చేయలేదు” అని ఆయన అన్నారు. ఐరాస సంస్కరణల్లో భాగంగా భద్రతా మండలిలోని శాశ్వత, తాత్కాలిక సభ్యత్వాల విభాగాలను విస్తరించాలని భారత్ కోరింది.

ఈ చర్చల సందర్భంగా 2027-28 కాలానికి ఐరాస భద్రతా మండలికి కొత్తగా ఎన్నికైన ఆస్ట్రియా, కిర్గిజిస్తాన్, పోర్చుగల్, ట్రినిడాడ్ అండ్ టొబాగో, జింబాబ్వే దేశాలకు భారత రాయబారి అభినందనలు తెలియజేశారు.