యూఏఈ (UAE), వెనిజులా, బ్రెజిల్, చెక్ రిపబ్లిక్, సౌత్ ఆఫ్రికా వంటి పలు దేశాల నుండి వంతారాకు జరిగిన ప్రతి జంతువు బదిలీని కోర్టు క్షుణ్ణంగా పరిశీలించింది. ఈ బదిలీలన్నీ చట్టబద్ధంగా, వాణిజ్యేతర ప్రయోజనాల కోసం (Non-commercial), అంతర్జాతీయ ‘సైట్స్’ (CITES) నిబంధనల ప్రకారం చెల్లుబాటు అయ్యే ఎగుమతి, దిగుమతి పర్మిట్లు మరియు ‘సెంట్రల్ జూ అథారిటీ’ (CZA) యొక్క అవసరమైన అనుమతులతో జూ-టు-జూ (Zoo-to-Zoo) పద్ధతిలోనే జరిగాయని కోర్టు నిర్ధారించింది. ఒకవేళ విదేశీ ఎగుమతిదారు వారి స్వదేశంలో ఏదైనా చిన్నపాటి లోపాలు చేసి ఉంటే, చట్టబద్ధంగా జంతువులను స్వీకరించిన భారతీయ సంస్థపై ఆ బాధ్యతను మోపలేమని కోర్టు స్పష్టం చేసింది.

జామ్‌నగర్‌లో ప్రపంచవ్యాప్తంగా గుర్తింపు పొందేలా అంతర్జాతీయ స్థాయి వన్యప్రాణుల పరిరక్షణ పనులు జరుగుతున్నాయని సుప్రీంకోర్టు గుర్తించింది. అంతరించిపోతున్న ‘మకావ్’ (Macaws) పక్షి జాతులను తిరిగి వాటి సహజ సిద్ధమైన వాతావరణంలోకి చేర్చడానికి బ్రెజిల్‌తో నేరుగా భాగస్వామ్యం కావడం, అంతర్జాతీయ జాతుల పునరుద్ధరణ కోసం సంరక్షణ ప్రజనన కార్యక్రమాలను (Conservation Breeding Programme) నిర్వహించడాన్ని కోర్టు కొనియాడింది. చట్టబద్ధంగా ఇక్కడికి తీసుకొచ్చిన తర్వాత, పూర్తి సంరక్షణలో ఉన్న జంతువుల వాతావరణాన్ని కలవరపెట్టడం కూడా ఒక రకమైన క్రూరత్వమే అవుతుందని ధర్మాసనం అభిప్రాయపడింది. వంతారా ఏ సంక్షేమ సూత్రాల ఆధారంగా స్థాపించబడిందో, దానికి కోర్టు మద్దతు పలికింది.

సుప్రీంకోర్టు తీర్పుపై వంతారా చీఫ్ ఎగ్జిక్యూటివ్ ఆఫీసర్ (CEO) వివహాన్ కరానీ స్పందిస్తూ హర్షం వ్యక్తం చేశారు. “ఈ తీర్పు మేము మొదటి నుండి నమ్ముతున్న నిజాన్ని నిరూపించింది. మా సంరక్షణలో ఉన్న ప్రతి జంతువు చట్టబద్ధంగానే వచ్చింది, నైతికంగానే చూసుకోబడుతోంది. దేశ అత్యున్నత న్యాయస్థానం మా పనిలోని నిజాయితీని, దాని వెనుక ఉన్న ఆశయాన్ని గుర్తించింది. వంతారాలో వన్యప్రాణుల పరిరక్షణ అనేది కేవలం మాటలకే పరిమితం కాదు.. అది ప్రతిరోజూ చూపే కారుణ్యం. మమ్మల్ని విమర్శించిన వారికి మేము ఇచ్చే సమాధానం ఒక్కటే.. ‘ప్రతి ప్రాణం ముఖ్యమే’ (Every Life Matters). మాపై బాధ్యత మరింత పెరిగింది, మాపై ఆధారపడిన వన్యప్రాణుల కోసం మేము మరింత కట్టుబడి పని చేస్తాం” అని ఆయన పేర్కొన్నారు.