టీజర్ ప్రారంభం నుంచే గట్టి ప్రభావాన్ని చూపిస్తుంది. భిక్షాటన చేసే వారి కఠిన జీవితాల గురించి కథానాయకుడు మాట్లాడుతూనే, వారిని వేధించే వారికి ఘాటైన హెచ్చరిక ఇస్తాడు. అనంతరం యాక్షన్, భావోద్వేగాలు, మిస్టరీ అంశాలతో కూడిన ఆసక్తికర దృశ్యాలు వరుసగా కనిపిస్తాయి. సినిమాలోని ప్రధాన పాత్రలను ఒక్కొక్కటిగా పరిచయం చేస్తూ కథపై ఉత్కంఠను పెంచారు. అయితే టీజర్‌లో అత్యంత ఆసక్తికరమైన ప్రశ్నకు మాత్రం సమాధానం ఇవ్వలేదు. విజయ్ సేతుపతి పాత్ర నిజంగానే అంధుడా? లేక అతని రూపం వెనుక మరేదైనా రహస్యం దాగి ఉందా? అనే సందేహాన్ని ప్రేక్షకుల్లో కలిగించారు.

విభిన్న కథలు, ప్రత్యేకమైన పాత్రల రూపకల్పనలో తనదైన ముద్ర వేసే పూరి జగన్నాథ్, ఈసారి విజయ్ సేతుపతి కోసం ఆసక్తికరమైన పాత్రను సృష్టించారు. ముఖ్యంగా హీరో పాత్ర చుట్టూ ఉన్న రహస్యం టీజర్‌కు ప్రధాన బలంగా నిలిచి, సినిమాపై మరింత ఆసక్తిని పెంచుతోంది.

విజయ్ సేతుపతి తన అద్భుతమైన నటనతో టీజర్‌ను మరో స్థాయికి తీసుకెళ్లారు. చూపు లేని భిక్షగాడి పాత్రలో ఆయన పూర్తిగా ఒదిగిపోయారు. కళ్లుచూడలేని పరిస్థితిలో ఉన్నప్పటికీ బలహీనులను రక్షించే ధైర్యవంతుడిగా కనిపించడం ప్రత్యేక ఆకర్షణగా నిలిచింది. ఆయన రూపాంతరం, స్క్రీన్ ప్రెజెన్స్ ప్రేక్షకులను ఆకట్టుకుంటున్నాయి.

ఈ చిత్రంలో సంయుక్త కథానాయికగా నటిస్తుండగా, ప్రముఖ నటి టబు పోలీస్ అధికారిణి పాత్రలో పవర్‌ఫుల్‌గా కనిపించారు. దునియా విజయ్ విలన్ పాత్రలో భయానకమైన లుక్‌తో మెప్పించగా, బ్రహ్మాజీ, వీవీటీ గణేష్ తదితరులు కీలక పాత్రల్లో కనిపించనున్నారు.

సాంకేతికంగా టీజర్ మంచి ముద్ర వేసింది. ఛాయాగ్రాహకుడు సామ్ కె. నాయుడు తన కెమెరా పనితనంతో చిత్రానికి రా అండ్ గ్రిటీ విజువల్ టెక్స్చర్‌ను అందించారు. జాతీయ అవార్డు గ్రహీత హర్షవర్ధన్ రామేశ్వర్ అందించిన నేపథ్య సంగీతం టీజర్‌లోని తీవ్రతను మరింత పెంచింది. ఎడిటర్ సంతోష్ నూజిల్లా చేసిన షార్ప్ కట్స్ టీజర్‌ను వేగవంతంగా, ఆసక్తికరంగా నిలబెట్టాయి. భారీ స్థాయిలో రూపొందుతున్న ఈ చిత్రం నిర్మాణ విలువలు కూడా స్పష్టంగా కనిపిస్తున్నాయి.

విజయ్ సేతుపతి, సంయుక్త, టబు, దునియా విజయ్ కుమార్, బ్రహ్మాజీ, వీవీటీ గణేష్ తదితరులు ప్రధాన పాత్రలు పోషిస్తున్న ఈ సినిమా షూటింగ్ ఇప్పటికే పూర్తయింది. ప్రస్తుతం పోస్ట్ ప్రొడక్షన్ పనులు చివరి దశకు చేరుకోగా, అన్ని భాషల వెర్షన్ల పనులు వేగంగా కొనసాగుతున్నాయి.

పూరి జగన్నాథ్, చార్మీ కౌర్ సంయుక్తంగా పూరి కనెక్ట్స్ బ్యానర్‌పై, జేబీ నారాయణరావు కొండ్రోళ్ల జేబీ మోషన్ పిక్చర్స్ సహకారంతో ఈ చిత్రాన్ని నిర్మిస్తున్నారు. ఇప్పటికే టీజర్‌తో భారీ అంచనాలు పెంచుకున్న ఈ చిత్రం విడుదలకు ముందే సినీ వర్గాల్లో హాట్ టాపిక్‌గా మారింది.