Last Updated:
భార్యాభర్తల మధ్య చిన్నగా జరిగిన గొడవ ప్రాణం తీసే వరకు వెళ్లింది. అసలు ఏం జరిగింది? ప్రేమించి మరి పెళ్లి చేసుకున్న ఈ జంట జీవితంలో ఎందుకు ఈ హోరం జరిగింది?
భార్య హత్య కేసు ఆలస్యంగా వెలుగులోకి వచ్చింది. అనుసూయ అనే మహిళను హత్య చేసినట్లు ఆరోపణలు ఎదుర్కొంటున్న ఆమె భర్త సాగర్ చంద్ర రావత్ను పోలీసులు అరెస్టు చేశారు. బెంగళూరు సంపిగేహళ్లి సమీపంలోని ఎంఎస్ నగర్లోని ఖాళీ స్థలంలో సెప్టెంబర్ 2న తీవ్రంగా కుళ్లిపోయిన స్థితిలో అనుసూయ మృతదేహం లభించింది. మృతదేహం గుర్తుపట్టలేని స్థితిలో ఉండటంతో ఆమె ఎవరో నిర్ధారించేందుకు పోలీసులు పలు ఆధారాలను పరిశీలించారు. ఈ కేసులో మూడు వారాలకు పైగా దర్యాప్తు అనంతరం సాగర్ను అదుపులోకి తీసుకున్నట్లు వార్తా సంస్థ PTI తెలిపింది.
పోలీసుల వివరాల ప్రకారం, ఆగస్టు 11న డబ్బు విషయమై సాగర్, అనుసూయ మధ్య వాగ్వాదం జరిగింది. ఈ క్రమంలో సాగర్ తన భార్యపై దాడి చేసి, గొంతు నులిమినట్లు పోలీసులు ఆరోపించారు. ఊపిరాడకపోవడంతో అనుసూయ మరణించినట్లు దర్యాప్తులో వెల్లడైంది. అనంతరం మృతదేహాన్ని దాదాపు మూడు రోజుల పాటు వారి ఇంట్లోనే ఉంచినట్లు పోలీసులు తెలిపారు.
ఆ తర్వాత మృతదేహాన్ని బెడ్షీట్లో చుట్టి, తాడుతో కట్టి, అర్ధరాత్రి సమయంలో ఇంటి నుంచి బయటకు తీసుకెళ్లినట్లు పోలీసులు పేర్కొన్నారు. తాను పోలీసులకు పట్టుబడతాననే భయంతో మృతదేహాన్ని సమీపంలోని ఖాళీ స్థలంలో పడేసి తిరిగి ఇంటికి వెళ్లాడు. అనంతరం తనకు సంబంధించిన వస్తువులను తీసుకుని ఇంటికి తాళం వేసి, దంపతులు పనిచేస్తున్న యలహంకలోని చిన్న హోటల్ ప్రాంగణంలోనే ఉండడం ప్రారంభించినట్లు పోలీసులు తెలిపారు.
గ్రేటర్ బెంగళూరు అథారిటీ ఆదేశాల మేరకు ఖాళీ స్థలాలను శుభ్రం చేస్తున్న కార్మికులు సెప్టెంబర్ 2న అక్కడ మృతదేహాన్ని గుర్తించారు. వెంటనే వారు అధికారులకు సమాచారం అందించారు. మృతదేహం అప్పటికే తీవ్రంగా కుళ్లిపోవడంతో పోస్టుమార్టం అనంతరం పోలీసులు, స్థానికులు కలిసి అంత్యక్రియలు నిర్వహించారు.
మృతదేహం గుర్తుపట్టలేని స్థితిలో ఉండటంతో మహిళ వివరాలు తెలుసుకోవడం పోలీసులకు సవాలుగా మారింది. అయితే ఆమె ధరించిన దుస్తులపై ఉన్న ఓ మాల్ ట్యాగ్ కీలక ఆధారంగా మారింది. దాని ఆధారంగా దుస్తుల బిల్లింగ్ వివరాలను పోలీసులు పరిశీలించారు. దుస్తులకు సంబంధించిన వివరాలతో పాటు గణేశుడి లాకెట్, సాంకేతిక విశ్లేషణను ఉపయోగించి మృతురాలు అనుసూయేనని నిర్ధారించినట్లు పోలీసులు తెలిపారు.
మాల్లో జరిపిన విచారణ ద్వారా అనుసూయ గుర్తింపుతో పాటు ఆమె చిరునామాను కూడా పోలీసులు తెలుసుకున్నారు. ఎంఎస్ నగర్లోని ఆమె ఇంటికి వెళ్లగా అది తాళం వేసి కనిపించింది. స్థానికులను విచారించగా అనుసూయ, సాగర్ యలహంకలోని ఓ చిన్న హోటల్లో పనిచేస్తూ అక్కడే నివసించేవారని తెలిసింది.
పోలీసుల ప్రకారం, సాగర్ సుమారు ఐదేళ్ల క్రితం బెంగళూరుకు వచ్చాడు. దాదాపు రెండేళ్ల క్రితం అనుసూయను వివాహం చేసుకున్నాడు. దర్యాప్తులో అతడి వాంగ్మూలంలో కొన్ని వ్యత్యాసాలను గుర్తించిన పోలీసులు వాటిపై ప్రశ్నించగా, విచారణ సమయంలో హత్యకు పాల్పడినట్లు సాగర్ అంగీకరించినట్లు తెలిపారు. కేసులో తదుపరి దర్యాప్తు కొనసాగుతోంది.
