సియాసాత్ కథనం ప్రకారం.. హైదరాబాద్ నగరంలోని ప్రధాన ఆస్పత్రులు ఈ నిరసన కార్యక్రమాలకు వేదికగా మారాయి. ఎర్రగడ్డలోని డాక్టర్ బీఆర్కేఆర్ ప్రభుత్వ ఆయుర్వేద కళాశాల, బేగంపేటలోని కొణిజేటి రోశయ్య ప్రభుత్వ నేచర్ క్యూర్ ఆస్పత్రి, చార్మినార్ వద్ద ఉన్న ప్రభుత్వ నిజామియా యునానీ ఆస్పత్రుల ఆవరణలో వైద్య విద్యార్థులు పెద్ద ఎత్తున ధర్నాలు చేపట్టారు. తమ సమస్యలు పరిష్కరించాలని కోరుతూ గత రెండేళ్లలో ఏకంగా 60 సార్లు ప్రభుత్వానికి వినతిపత్రాలు సమర్పించామని, అయినా పాలకులు ఏమాత్రం పట్టించుకోలేదని చార్మినార్ వద్ద ఆందోళనలో పాల్గొన్న విద్యార్థులు తీవ్ర ఆవేదన వ్యక్తం చేశారు.

ఉమ్మడి రాష్ట్రంలో అందరికీ సమానంగా వేతనాలు అందేవని, ఇప్పుడు మాత్రం తమ పట్ల తీవ్ర వివక్ష కనిపిస్తోందని నిరసనకారులు ఆగ్రహం వ్యక్తం చేస్తున్నారు. పక్కనే ఉన్న ఆంధ్రప్రదేశ్‌లో ఆయుష్ పీజీ విద్యార్థులకు నెలకు రూ.60 వేల స్టైపెండ్ అందుతుండగా, తెలంగాణలో మాత్రం కేవలం రూ.30 వేలు మాత్రమే ఇస్తున్నారని వారు అసంతృప్తి వ్యక్తం చేశారు. తమ న్యాయమైన డిమాండ్లను ప్రభుత్వం సానుకూలంగా పరిశీలించి పరిష్కరించే వరకు ఈ నిరవధిక సమ్మెను విరమించేది లేదని ఆయుష్ డాక్టర్లు తెగేసి చెబుతున్నారు.