ఈ సరికొత్త ఒప్పందం అమల్లోకి వస్తే న్యూజిలాండ్‌కు వెళ్లే నూరు శాతం భారతీయ ఎగుమతులపై ఎలాంటి సుంకం (ట్యాక్స్) ఉండదు. దీనివల్ల మన దేశంలోని జౌళి, దుస్తులు, తోలు ఉత్పత్తులు, రత్నాలు, ఆభరణాలు, ఇంజనీరింగ్ రంగాలకు భారీ లబ్ధి చేకూరుతుంది. భవిష్యత్తులో ఆర్థిక సహకారాన్ని మరింత బలోపేతం చేసే దిశగా వచ్చే 15 ఏళ్లలో భారత్‌లో సుమారు 20 బిలియన్ డాలర్ల పెట్టుబడులు పెట్టేందుకు న్యూజిలాండ్ అంగీకరించింది. మన దేశ రైతులు, పాడి పరిశ్రమను రక్షించుకునేందుకు వ్యవసాయం, చక్కెర, కొన్ని లోహాలను ఈ ఒప్పందం నుంచి మినహాయించారు.

వ్యాపారాలతో పాటే భారతీయ విద్యార్థులు, నిపుణులకు ఈ ఒప్పందం సరికొత్త అవకాశాలు కల్పిస్తోంది. తాత్కాలిక ఉపాధి వీసా కింద ఏటా 5,000 మంది నైపుణ్యం కలిగిన భారతీయులకు మూడేళ్ల పాటు న్యూజిలాండ్‌లో ఉండేందుకు వెసులుబాటు దక్కుతుంది. ఐటీ, ఇంజనీరింగ్, యోగా, ఆయుష్ నిపుణులు ఈ జాబితాలో ఉంటారు. అలాగే ‘వర్కింగ్ హాలిడే వీసా’ విధానం కింద ఏటా మరో 1,000 మంది యువత ఏడాది పాటు అక్కడ పర్యటించే అవకాశం దక్కించుకుంటారు.

ఈ ఒప్పందం వరంగా మారనుంది. అర్హత కలిగిన విద్యార్థులు చదువుకుంటూనే వారానికి 20 గంటల పాటు పార్ట్ టైమ్ ఉద్యోగాలు చేసుకోవచ్చు. చదువు పూర్తయిన తర్వాత వర్క్ వీసాలను పొడిగించుకునే అవకాశం కూడా ఉంటుంది. ఇలా అక్టోబర్ 20 నుంచి ఈ ప్రయోజనాలన్నీ నేరుగా ప్రజలకు, వ్యాపారులకు అందుబాటులోకి రానున్నాయి.