కేంద్ర ప్రభుత్వం చేత గుర్తింపు పొందిన ‘ఫిల్మ్ ఫెడరేషన్ ఆఫ్ ఇండియా (FFI)’ కు తాను వైస్ ప్రెసిడెంట్ గా కూడా వ్యవహరిస్తున్నానని, ఆ జాతీయ స్థాయి అనుభవంతో ఏపీకి ప్రత్యేక గుర్తింపు తెచ్చేలా కృషి చేస్తానని సీఎంకు వివరించారు. ముఖ్యంగా ఆంధ్రప్రదేశ్ ను సినీ పరిశ్రమకు అనుకూలమైన ప్రధాన గమ్యస్థానంగా మార్చే దిశగా తన బృందంతో కలిసి పకడ్బందీగా అడుగులు వేస్తానని ఆయన హామీ ఇచ్చారు. రాష్ట్రంలో స్టూడియోల నిర్మాణం, సింగిల్ విండో విధానం ద్వారా షూటింగ్‌ల అనుమతులు సులభతరం చేయడం, సినీ కార్మికులకు ఉపాధి అవకాశాలు మెరుగుపరచడం వంటి అంశాలపై కార్పొరేషన్ అహర్నిశలు పనిచేస్తుందన్నారు.

ఈ అత్యంత వైభవంగా జరగనున్న సినీ ముహూర్తపు కార్యక్రమానికి రాష్ట్ర విద్య, ఐటీ శాఖ మంత్రి గౌరవ నారా లోకేష్, అలాగే పర్యాటక, సినిమాటోగ్రఫీ శాఖ మంత్రి గౌరవ కందుల దుర్గేష్ ముఖ్య అతిథులుగా హాజరు కావడం విశేషమన్నారు. మంత్రుల రాకతో ఈ ఈవెంట్ కు మరింత వన్నె రానుందని ఆయన అభిప్రాయపడ్డారు. భవిష్యత్తులో ఆంధ్రప్రదేశ్ లో ఇలాంటి భారీ చిత్రాల ప్రారంభోత్సవాలు, షూటింగ్‌లు, సినిమా వేడుకలు మరెన్నో జరిగేలా, పరిశ్రమకు సానుకూల వాతావరణం కల్పించేలా తమ టీం అంతా సమిష్టిగా కృషి చేస్తుందని భరత్ భూషణ్ స్పష్టం చేశారు.