దీంతో బీసీసీఐ కార్యదర్శి దేవజిత్ సైకియా అనూహ్యంగా స్పందిస్తూ రోహిత్ శర్మ వన్డే జట్టులో రెగ్యులర్ సభ్యుడని బహిరంగంగా ప్రకటించాడు. లార్డ్స్ వన్డే అతనికి ఆఖరిది కాదని తేల్చిచెప్పాడు. బోర్డు పెద్దల తీరుతో అగార్కర్ తీవ్ర మనస్తాపానికి గురయ్యాడు. స్టార్ ఆటగాళ్లపై నిర్ణయాలు తీసుకునే స్వేచ్ఛ తనకు లేదని గ్రహించే ఆయన పదవి నుంచి తప్పుకోవాలని నిర్ణయించుకున్నాడు.

రోహిత్ వివాదంతో పాటు ఎన్సీఏ అధిపతి వీవీఎస్ లక్ష్మణ్‌తో తలెత్తిన విభేదాలు కూడా అగార్కర్ నిర్ణయంపై తీవ్ర ప్రభావం చూపాయి. ఆసియా క్రీడలకు ప్రధాన జట్టును పంపే విషయంలో ఇద్దరి మధ్య వాగ్వాదం జరిగింది. గాయపడిన ఆటగాళ్ల ఫిట్‌నెస్ నివేదికల విషయంలో సెలెక్షన్ కమిటీకి లక్ష్మణ్ సహకరించలేదని వార్తలు వస్తున్నాయి.

ఇండియా-ఎ టూర్లు, ఇరానీ కప్ లాంటి దేశవాళీ టోర్నీల షెడ్యూలింగ్ విషయంలోనూ అగార్కర్, లక్ష్మణ్ మధ్య ఏకాభిప్రాయం కుదరలేదు. బోర్డు నుంచి సరైన మద్దతు లేకపోవడం, ఎన్సీఏతో సమన్వయ లోపం కారణంగానే అగార్కర్ రాజీనామాకు మొగ్గుచూపినట్లు క్రీడా వర్గాల్లో బలమైన చర్చ నడుస్తోంది.