ప్రజలకు భద్రత, రక్షణ కల్పించాల్సిన పోలీసులే వారి పాలిట భక్షకులుగా మారుతున్నారనే విమర్శలు వెల్లువెత్తుతున్నాయి. డ్యూటీలో ఉండి ఒంటిపై ఖాకీ యూనిఫామ్ వేసుకున్న ఓ రైల్వే పోలీస్ కానిస్టేబుల్ హైదరాబాద్‌లోని హఫీజ్‌పేట్ రైల్వే స్టేషన్‌ పరిధిలో ఓ మహిళను కొట్టి.. జుట్టు పట్టి ఈడ్చుకెళ్లాడు. శుక్రవారం రాత్రి జరిగిన ఈఘటనకు సంబంధించిన వీడియో సోషల్ మీడియాలో తెగ వైరల్ అవుతోంది. చీకటిగా ఉండటంతో పోలీస్ పేరు, అతని ఐడీ నంబర్ సరిగా కనిపించలేదు.

ఓ దుకాణం దగ్గర అచేతనంగా నిలబడి ఉన్న మహిళను కానిస్టేబుల్ ఏదో విషయంలో ప్రశ్నించాడు. దానికి ఆమె బదులు ఇవ్వకపోవడంతో ఆమెపై ఒక్కసారిగా విరుచుకుపడ్డాడు. విచక్షణారహితంగా కొట్టడమే కాకుండా అక్కడి నుంచి జుట్టు పట్టుకొని స్టేషన్ వైపుకి ఆమెను లాక్కెళ్లాడు రైల్వే పోలీస్ కానిస్టేబుల్. విచిత్రం ఏమిటంటే ఈఘటన జరుగుతున్న సమయంలో పక్కనే ఆమె భర్త కూడా ఉన్నాడు. తన భార్యను వదిలేయమని భర్త కానిస్టేబుల్‌ని వేడుకున్నప్పటికి వినిపించుకోలేదు.

ఖాకీ యూనిఫామ్‌లో ఉన్న రైల్వే పోలీస్ కానిస్టేబుల్ కనికరం లేకుండా ఆమెపై పైశాచికత్వం ప్రదర్శించాడు. రైల్వే పోలీస్ కానిస్టేబుల్ తీరుపై తారాస్థాయిలో విమర్శలు వెల్లువెత్తుతున్నాయి. సోషల్ మీడియాలో వీడియో వైరల్ అవుతున్న ఈ వీడియోని చూపిస్తూ నెటిజన్లు పోలీస్ కానిస్టేబుల్‌పై చర్యలు తీసుకోరా అని ప్రశ్నిస్తున్నారు. నేరం, తప్పు చేసిన వాళ్లను కాపాడే పోలీసులు.. ఇలా అమాయకులపైనే తమ ప్రతాపం చూపిస్తారంటూ విస్తృతంగా కామెంట్స్ పెడుతున్నారు.హఫీజ్‌పేట్ రైల్వే స్టేషన్ వద్ద మహిళపై దాడి ఘటనలో హోమ్ గార్డ్ ఆనంద్‌పై మియాపూర్ పోలీసులు కేసు నమోదు చేసి అరెస్ట్ చేశారు.