శ్రీ‌వారి మెట్టు, అలిపిరి న‌డ‌క మార్గాల ద్వారా కూడా భారీ సంఖ్యలో భక్తులు కొండపైకి చేరుకుంటున్నారు. తెల్లవారుజాము నుంచే భక్తుల రాకపోకలు కొనసాగుతుండటంతో తిరుమల అంతా భక్తి సంద్రంలా మారింది. వైకుంఠం క్యూ కాంప్లెక్స్ వెలుపల ఉన్న అన్ని క్యూ లైన్లు భక్తులతో కిక్కిరిసిపోయాయి. ప్రస్తుతం సర్వదర్శనం భక్తులను క్యూ లైన్లలోకి పరిమితంగా అనుమతిస్తున్నామని, భక్తులు ముందస్తు ప్రణాళికతో రావాలని టీటీడీ విజ్ఞప్తి చేస్తోంది.

భక్తుల రద్దీని దృష్టిలో ఉంచుకుని టీటీడీ విస్తృత ఏర్పాట్లు చేపట్టింది. మాతృశ్రీ తరిగొండ వెంగమాంబ అన్నప్రసాద సముదాయం, తిరుమలలోని అన్నప్రసాద కేంద్రాలు, నారాయణగిరి ఉద్యానవనాలు, ఇతర రద్దీ ప్రాంతాల్లో భక్తులకు నిరంతరం ఆహారం, తాగునీరు, పాలు అందజేస్తున్నారు. క్యూ లైన్లలో వేచి ఉన్న చిన్నారులు, వృద్ధులకు ప్రత్యేక సౌకర్యాలు కల్పిస్తూ అధికారులు ఎప్పటికప్పుడు పరిస్థితిని సమీక్షిస్తున్నారు.

శ్రీవారి సేవకులు, అన్నప్రసాదం, ఆరోగ్య, విజిలెన్స్ విభాగాల సిబ్బంది సమన్వయంతో సేవలు అందిస్తున్నారు. శిలాతోరణం, బాటగంగమ్మ ఆలయం పరిసరాలు, క్యూ లైన్ల వెంట భక్తులకు అన్నప్రసాదాలు, మంచినీరు అందుబాటులో ఉంచారు. ఎండ తీవ్రతను దృష్టిలో ఉంచుకుని భక్తులకు ఎలాంటి ఇబ్బందులు కలగకుండా ప్రత్యేక చర్యలు చేపట్టారు. భక్తుల రవాణా సౌకర్యం కోసం అక్టోపస్ భవనం నుంచి శిలాతోరణం వరకు ఉచిత బస్సులను ఏర్పాటు చేశారు. ప్రతి కొన్ని నిమిషాలకు ఒక బస్సు అందుబాటులో ఉండేలా చర్యలు తీసుకోవడంతో క్యూ లైన్లలో ఉన్న భక్తులు కొంత ఉపశమనం పొందుతున్నారు. రద్దీ ఎక్కువగా ఉన్న ప్రాంతాల్లో అదనపు సిబ్బందిని కూడా మోహరించారు.

ఇక భద్రతా పరంగా కూడా టీటీడీ అప్రమత్తమైంది. క్యూ లైన్లలో ఎలాంటి తొక్కిసలాటలు జరగకుండా విజిలెన్స్, పోలీసు సిబ్బంది పటిష్ట బందోబస్తు నిర్వహిస్తున్నారు. ఒక్క వెంగమాంబ అన్నప్రసాద సముదాయం నుంచే వేలాదిమంది భక్తులకు భోజన సదుపాయం కల్పించగా, క్యూ లైన్లలో వేచి ఉన్న దాదాపు 50 వేల మందికి అన్నప్రసాదాలు పంపిణీ చేశారు. భక్తుల రద్దీ మరికొన్ని రోజులు కొనసాగనున్న నేపథ్యంలో తిరుమలకు వచ్చే వారు దర్శన సమయాలను ముందుగానే తెలుసుకుని ప్రయాణం ప్లాన్ చేసుకోవాలని టీటీడీ సూచిస్తోంది.