ప్రభుత్వం కేటాయించిన నిధులను ప్రధానంగా ఆలయాల అభివృద్ధి, మౌలిక సదుపాయాల కల్పనకు సద్వినియోగం చేయాలని అధికారులకు మంత్రి దిశానిర్దేశం చేశారు. రద్దీ ఎక్కువగా ఉండే ఆలయాల వద్ద ప్రత్యేక క్యూలైన్లు, విద్యుత్ దీపాలంకరణలు, భద్రత కోసం సీసీటీవీ కెమెరాల ఏర్పాటు అత్యవసరమని స్పష్టం చేశారు. అలాగే త్రాగునీరు, పారిశుద్ధ్య నిర్వహణ, వైద్య శిబిరాల ఏర్పాటుపై ప్రత్యేక దృష్టి సారించాలని సూచించారు. భక్తుల రద్దీని దృష్టిలో ఉంచుకుని పకడ్బందీ భద్రతా ఏర్పాట్లతో పాటు, ట్రాఫిక్ మళ్లింపు ప్రణాళికలను పక్కాగా అమలు చేయాలని పోలీసు అధికారులను అప్రమత్తం చేశారు.

మహిళలు, వృద్ధుల సౌకర్యార్థం ఈసారి బోనాల్లో ప్రత్యేక ఏర్పాట్లు చేస్తున్నారు. పసిపిల్లల తల్లుల కోసం ఆలయాల ప్రాంగణాల్లో ప్రత్యేకంగా చనుబాలు ఇచ్చే గదులను ఏర్పాటు చేయాలని మంత్రి సురేఖ అధికారులకు కచ్చితమైన ఆదేశాలు జారీ చేశారు. వృద్ధులకు దర్శనంలో ఇబ్బందులు లేకుండా ప్రత్యేక సదుపాయాలు కల్పించనున్నారు. రాష్ట్ర ప్రభుత్వం అమలు చేస్తున్న మహాలక్ష్మి ఉచిత బస్సు ప్రయాణ పథకం కారణంగా మహిళా భక్తుల రద్దీ భారీగా పెరిగే అవకాశం ఉందని ఆమె అంచనా వేశారు. ఆ రద్దీకి తగ్గట్టుగా అదనపు బస్సులు నడపాలని రవాణా శాఖ మంత్రి పొన్నం ప్రభాకర్‌ను ఆమె కోరారు.