తమ అధికారిక ఎక్స్ (ట్విట్టర్) ఖాతా ద్వారా వీడియోను షేర్ చేసిన పవన్ కళ్యాణ్, “తుఫాను రాకముందు ఒక నిశ్శబ్ద క్షణం ఉంటుంది. గంభీర కథలో ఇంకా చెప్పని అధ్యాయం ఇప్పుడు తెరపైకి రానుంది. దర్శకుడు సుజీత్, పవన్ కళ్యాణ్ మరోసారి కలిసి ఓజీ యూనివర్స్‌ను విస్తరించబోతున్నారు” అంటూ పేర్కొన్నారు.

విడుదలైన వీడియోలో పవన్ కళ్యాణ్, దర్శకుడు సుజీత్ మధ్య జరిగిన తొలి క్రియేటివ్ మీటింగ్‌కు సంబంధించిన కొన్ని అరుదైన క్షణాలను చూపించారు. ఓజీ కథను ఎలా విస్తరించాలి? భవిష్యత్తులో దాన్ని యూనివర్స్‌గా ఎలా మార్చాలి? అనే అంశాలపై ఇద్దరూ చర్చించిన దృశ్యాలు అభిమానుల్లో ఆసక్తిని మరింత పెంచాయి.

ఇదే విషయంపై గతంలో పవన్ కళ్యాణ్ కూడా ఆసక్తికర వ్యాఖ్యలు చేశారు. ప్రత్యేక ప్రదర్శన సందర్భంగా మాట్లాడుతూ, “ఓజీ అద్భుతమైన సినిమా. మంచి సినిమా వెనుక గొప్ప టీమ్ ఉండాలి. కలెక్షన్ల గురించి నాకు తెలియదు కానీ ఓజీ ప్రేక్షకులకు గొప్ప అనుభూతిని ఇస్తుంది. ముఖ్యంగా ఓజీ యూనివర్స్ కోసం మేమంతా ఎదురుచూస్తున్నాం. ఇది పూర్తిగా సుజీత్ ఆలోచన. థమన్‌లో ఉన్న ప్రతిభను సుజీత్ అద్భుతంగా ఉపయోగించుకున్నారు” అని ప్రశంసించారు.

ఇక ‘ఓజీ 2’పై కీలక అప్‌డేట్ వచ్చింది. పవన్ కళ్యాణ్ క్రియేటివ్ వర్క్స్ ప్రకారం, దర్శకుడు సుజీత్ విదేశీ పర్యటన నుంచి తిరిగి వచ్చిన తర్వాత ‘ఓజీ 2’పై అధికారిక చర్చలు ప్రారంభం కానున్నాయి. దీంతో సీక్వెల్ తప్పకుండా రాబోతుందనే సంకేతాలు మరింత బలపడ్డాయి.

‘దే కాల్ హిమ్ ఓజీ’ కథ విషయానికి వస్తే.. ఓజాస్ గంభీర అలియాస్ ఓజీ అనే మాజీ సమురాయి పాత్ర చుట్టూ కథ తిరుగుతుంది. జపాన్ నుంచి భారత్‌కు వచ్చిన ఓజీ, సత్యనారాయణ అనే వ్యాపారవేత్తకు రక్షకుడిగా మారతాడు. అనంతరం ముంబై అండర్‌వరల్డ్‌లో అత్యంత భయంకరమైన గ్యాంగ్‌స్టర్‌గా ఎదుగుతాడు. అయితే అకస్మాత్తుగా పదేళ్ల పాటు అదృశ్యమవుతాడు. 1993లో అతను తిరిగి రావడంతో కథలో అసలు మలుపులు మొదలవుతాయి. ఎమ్రాన్ హష్మీ పోషిస్తున్న ఓమి భౌతో ఓజీకి జరిగే ప్రతీకార పోరాటమే కథకు ప్రధాన ఆకర్షణ.

ఈ చిత్రంలో పవన్ కళ్యాణ్‌తో పాటు ఎమ్రాన్ హష్మీ, ప్రకాశ్ రాజ్, అర్జున్ దాస్, ప్రియాంక మోహన్, శ్రియా రెడ్డి కీలక పాత్రలు పోషిస్తున్నారు. ఇప్పుడు ‘ఓజీ యూనివర్స్’ ప్రకటనతో అభిమానులు మరింత ఉత్సాహంగా ‘ఓజీ 2’ కోసం ఎదురుచూస్తున్నారు.