తాజాగా ఈ సినిమా ప్రమోషన్స్‌లో భాగంగా చిత్ర బృందం ఓ సరదా ఇంటర్వ్యూను ప్లాన్ చేసింది. దర్శకుడు రాహుల్ సాంకృత్యన్‌తో కలిసి విజయ్, రష్మిక పాల్గొన్న ఈ చిట్‌చాట్ ప్రోమోను మేకర్స్ సోషల్ మీడియాలో విడుదల చేశారు. ఇందులో వీరిద్దరి మధ్య జరిగిన సంభాషణ నెటిజన్లను విపరీతంగా ఆకట్టుకుంటోంది. ముఖ్యంగా రష్మిక వంట చేయడంపై విజయ్ దేవరకొండ చేసిన ఫన్నీ కామెంట్స్ వైరల్‌గా మారాయి. “రష్మిక వంట చేస్తే ఓ యుద్ధం చేసినట్లే” అని విజయ్ తనదైన శైలిలో ఆటపట్టించగా, దానికి రష్మిక ఇచ్చిన క్యూట్ రియాక్షన్స్ అభిమానులను మురిపిస్తున్నాయి. దర్శకుడు రాహుల్ సైతం సినిమా విశేషాలను పంచుకున్న ఈ పూర్తి స్థాయి ఇంటర్వ్యూ ఆదివారం ఉదయం యూట్యూబ్‌లో ప్రసారం కానుంది.

విజయ్ దేవరకొండకు గతంలో ‘టాక్సీవాలా’ వంటి సూపర్ హిట్ ఇచ్చిన దర్శకుడు రాహుల్ సాంకృత్యన్ ఈ ‘రణబాలి’ చిత్రాన్ని అత్యంత భారీ కాన్వాస్‌పై పాన్ ఇండియా స్థాయిలో తెరకెక్కిస్తున్నారు. స్వాతంత్ర్యానికి పూర్వం బ్రిటిషర్ల కాలం నాటి నేపథ్యంలో సాగే ఈ కథలో.. ఆంగ్లేయులపై వీరోచితంగా పోరాడే ‘సింగనమల బొబ్బిలి రణబాలి’ అనే ధైర్యశాలి అయిన యోధుడి పాత్రలో విజయ్ దేవరకొండ పవర్‌ఫుల్ లుక్‌లో కనిపించనున్నారు. ఇక ఆయన భార్య ‘జయమ్మ’ పాత్రలో రష్మిక నటిస్తోంది.

పెళ్లి తర్వాత ఈ రియల్ లైఫ్ కపుల్ నటిస్తున్న తొలి సినిమా కావడం, విజయ్-రష్మిక ఇద్దరూ పూర్తి భిన్నమైన డీ-గ్లామరైజ్డ్ పీరియాడిక్ పాత్రల్లో కనిపించనుండటంతో ట్రేడ్ వర్గాల్లో అంచనాలు తారాస్థాయికి చేరాయి. యాక్షన్, ఎమోషన్, దేశభక్తి తదితర అంశాలతో రాబోతున్న ‘రణబాలి’ దసరా బరిలో సరికొత్త సెన్సేషన్ క్రియేట్ చేస్తుందని అభిమానులు ధీమా వ్యక్తం చేస్తున్నారు.